SAMDALA
Samdala hi a thatchhe em em a, vawikhat chu ramah a kal a, theipui hmin thut hi a hmua, a ei duh si a, mahse a lo peih lova, a hnuaiah a mu zangthal a, a ang ta mai a. Nakinah chuan a ka chhungah pum khat a lo tla ta a, a thial peih lo hle a, a tawpah chuan a han thial a, a han lem hram a. Chumi lai tak chuan sakei tar pui a lo kal a, “Keia khi laia tangah khian min paw chho la, min ei ang che,” a ti a.
Sakei chuan a paw ta a, ” Ka ei tawh ang che,” a ti a. Samdala chuan, “He laiah hian ka han kal lawk a nge,” a ti a, a va kal a, a hnungah hian thei rah sen tak hi a dah a, “Khai le, min ei rawh,” a ti a . Sakei chuan a han ei dawn a , theirah sen tak chu a hmu a, “Hei engnge ni?” a ti a. Kha kha mihringte, sate ei zotu a nih kha,” a ti a . Sakei chuan a hlau va, a tlan ta a, Samdala chuan lungin a vawm a, “Kha englo sen takin a um a che,” a ti a.
Chumi hnu chuan Samdala chuan sawi a hnai a, a pumin a inhnawih a, hnathawk peih lovin nilengin hnahthel zingah a tal a tal a. Chumi lai chuan sakhi hi a lo kal a, hnahthel zinga tal tal chu a hmu a, mak ti takin a en a, a nui a nui a. Chutianga a lo en reng lai chuan, sazuk hi ava kal leh a, a hmuh ve leh a nui ve ta a.
Nakinah chuan sanghal hi a lo kal ve a, “Eng nge ni in en reng le? in va hlim ve,” a ti a, “Hei hnahthel zinga mi hian nuih a ti za em mai,” an ti a, sanghal chuan a nuih ve ta chiam a. Chutiang zel chuan ramsate chu an lo kal a, an vai chuan an en ta a.
A hnuhnung berah chuan satel hi a lo kal ve boh boh va, sa dangte chuan, “Tela, nang hian he mi hi i hria ang e?” an ti a. Satel chuan, “Ka sawi ngam lo, min tihlum mai ang e,” a ti a. Sa dangte chuan, “I hlauh chuan sazuk ki karah hian kan zep tlat ang chia, a chak si a, a tlanpui vak dawn che nia,” an ti a, satel chuan, “Chutianga min ven theih dawn chuan ka hrilh ang che u, Samdal thatchhe zawrkawia a nih kha,” a han ti a. Chu veleh Samdala chuan a um ta vak mai a, ramsa zawng zawng chu a um ho zo ta vek a.