RUNGINU LEH THIALTEA

Vawi khat chu Thialtea hian Runginu hnenah, “Runginu, vawiin chu ka thei hual i lo dun ang,” a ti a. Runginu chuan, “Kei zawng ka lawn thei ve si lova, a hmin tha min thlak duh ve awm lo em mai,” a ti a. Thialtea chuan, “Thlak duh e, a hmin tha tha ka thlak dawn che nia,” a ti a, Runginu chuan, “Min thlak ve dawn chuan ka duh e,” a ti a, an kal ta a, an thei lawh tur chu an va hmu a, a hmin tam hle mai a, Thialtea chuan, “Runginu, a bulah khan lo awm rawh le , ka han lo ang e,” a ti a, Runginu chuan, “Awle” a ti a, Thialtea chuan a han lo va, a hmin tha tha chu a ei thuai thuai a, a eina pilhawng chauh chu a thlak ta a. Runginu chuan, “Thialte, a hmin tha kha min han thlak ve rawh, i eina pil chauh min thlak a, ei tur a awm lo ve,” a ti a. Nimahsela, Thialtea chuan a thlak duh chuang lova, Runginu chu a lung a chhe hle a, a tap a tap ta a. A tah lai chuan Sazuk hi a lo kal a, “Runginu engahnge i tah koh koh le?” a ti a, Runginu chuan, “Thialtea’n thei lawhpuiah min sawm a, “A hmin tha tha ka thlak ang che,” a ti a, min thlak leh duh si lova, ka lung a chhia a ka tap a ni,” a ti a. Sazuk chuan, “Hau ta che,” a ti a, Runginu chuan, “Ka hau ngam lo min vel ang,” a ti a, Sazuk chuan, “A velh dawn che chuan ka chhan ang che,” a tia. Runginu chuan a hau ta a :

Thiala, Thiala, Thialtea,
I vunte kha rai hir hiar,
Sahdalah tla ri pem tla ri pem,
Zawnga kal theu theu,

a han ti a. Thialtea chuan a haw ta em em a, a chhuk thuai thuai a, Runginu chu a vel ta nek a. Sazuk lah khan a lo chhan ngam si lova, a tlansan ta daih a, Thialtea chu a lawn leh ta daih a, thei chu a ei leh ta mial mial a. Runginu chu a tap zel a, Savawm hi a lo kal leh a, “Runginu, engahnge i tah?” a ti a, Runginu chuan a sawi dan pangngai khan a sawi leh a. Savawm chuan, “Hau rawh ka chhan ang che,” ati a, a hau leh a, nimahsela a lo chhan ngam leh ta bik lova. Thialtea chu a zuk chhuk a, a vel leh ta nek mai a, ramsa dang dang an lo kal a, an hau tir zel a, mahse an chhan ngam lo leh thin.

Nakinah chuan Sakei hi a lo kal ve a, “Runginu engatinge i tah?” a ti a, Runginu chuan a sawi dan pangngaiin, “Thialtean thei lawhpuiah min sawm a, a hmin tha min thlak ve duh lova ka tap a ni,” a ti leh a, Sakei chuan, “Hau rawh ka chhan ang che, a ti a. Runginu chuan, “I lo kal hma pawh hian ramsa dangte pawh an lo kal a, hau rawh ka chhan ang che min ti a, ka han hauvin min chhan leh ngam si lova, min vaw
leh nek mai thin a, ka hau ngam tawh love,” a ti a. Sakei chuan, “Kei chuan ka chhan ngam ngei ngei ang che, hau leh rawh,” a ti a. Runginu chuan a hau dan pangngaiin :

Thiala, Thiala, Thialtea,
I vun te kha rai hir hiar,
Sahdalah tla ri pem, lla ri pem,
Zawng kal theu theu,

a han ti leh a. Thialte, chuàn a zuk vel leh dawn a, Sakei chuan a seh ta daih a, Runginu chu a hawng leh ta a.