LASIRI LEH LASARI LEH THANGSIRA LEH THANGZAIA

Lasiri leh Lasari hi unau an ni a, Lasiri hi a u zawk a ni a, vanah an awm a. Tin, Thangsira leh Thangzaia pawh hi unau bawk an ni a , Thangsira hi a u zawk a ni a, leia awm an ni a. He mite pali hi an awmna hrang mahse an in kawm ngeih em em mai a. Thangsira te unau chu vana Lasiri te inah chuan an han leng fo thin a; an len dawn apiang hian Thangsira Ieh Thangzaia chuan hla a sa a:

Lasiri leh Lasari,
Tukba lei la, rawn thlak la;
Thangsira uai chhoh nan e,
Thangzaia uai chnoh nan e.

Chutiang hla an han sak veleh chuan van atang hian hruizen sei tak hi an rawn thlak thla a, chutah chuan an unauvin an uai a, Lasiri te unau chuan an khai chho
thin a. Vanah chuan hlim takin an in kawm thin a; tin, an hawng leh thin a ni.

Bakvawmtepu hian Thangsira te unau leng fo thin chu a awt ve em em mai a, nikhat chu Thangsira te unau sak hma chuan Bakvawmtepu chuan an hlasak thin ang khan a va sak khalh ta a. Lasiri te chuan Thangsira te emaw tiin an hrui chu an zuk thlak a, chu veleh Bakvawmtepu chu a lo uai thuai a. Lasiri te chuan, “Zanina Thangsira te unau chu an va rit teh lul em!” an ti a. Nakinah chuan Bakvawmtepu chu an khai chhuak ta nawlh mai a; pawi an ti em em a. Nimahsela an hnar duh em si lova, an zingah chuan a awm ve ta a. Mut a lo hun chuan Lasiri te chuan van mawng pawp kiangah hian an muttir a, Lasiri chuan hla a han sa a:

Tawlh rawh, tawlh rawh, Bakvawmtepu,
Van tawl dep rawh, vantawli dep rawh,
Ka nauvi zalna bo ve,

a han ti a. Bakvawmtepu chu a tawlh hrut a, Lasiri chuan a hla sak chu a sa zel a, ani chu a tawlh zel a. A tawpah chuan van mawng pawpah chuan a tawlh thla ta daih mai a, a zan lehah chuan Thangsira te unau chuan hla an han sa leh a. Nimahsela Lasiri te chuan Bakvawmtepu a ni leh ang tih an hlau va, an thlak duh ta hauh lova, hetiangin an ti a:

Kan thlak nuam lo,
Kan thlak nuam lo,
Bakvawmtepu uai nan chuan,

an ti a. Thangsira te chuan, “Kan ni love, keimahni kan ni,” an tih pawhin an awi duh lova, an thlak duh ta hauh lova. Nakinah chuan Thangsira te chuan, “A nih loh leh, kha kan lo kal in phal lo vei maw? Keimahni kan nih leh nih loh in la hria ang, kan tlan daih dawn a nia.
Amaherawhchu kan kal hmain Bakvawmtepu nen mei kan han in khuk siak ang, kan mei khu chuan van a rawn chhun ngiah ngiah anga, Bakvawmtepu meikhu erawh chu lui dungah a zam darh chum chum ang,” an ti a.

An sawi aug chuan mei an han inkhuk siak a, Bakvawmtepu mei khu chu lui dungah chuan a zam darh ta chum chum mai a. Thangsira te meikhu erawh chuan van a chhun ngat ngat a; tin, chu mi hnu chuan an tlanbo ta daih mai a. An tlanbo ta chu Lasiri te unau chuan an hriat veleh um an tum a, an tlan ta a. Nakinah chuan lawm rual tam tak an va hmu a, Lasiri te chuan:

Khata lawmrualate u
Thangsira hmu che maw?
Thangzaia hmu che maw?

an ti a. Tin, lawm rualte chuan an lo chhang a:

A hmuh chu kan hmu na a,
Mual aw khum khum,
Mualpui aw khum khum,
A tawn archang phe ngauh ngauh,

an ti a. C huti chuan Lasiri te unau chuan mual an liam daih tawh tih an hriat chuan an um leh ta ngat ngat a. Nakinah chuan an va um pha lek lek ta a, Thangsira te unau chuan, “Lasiri ten min um phak dawn e, dar benvawnah i io chang ang,” an ti a, dar benvawn tha takah an lo chang a. An rawn um phak chuan dar benvawn tha tak chu an han hmu a, a nau zawk chuan lak a duh ta em em a, a u hnenah chuan:

Ai, ka u-i, ka u-i,
A he dar benvawn a tha;
La ta mai mai tang ka ti,

a ti a. A u chuan Thangsira leh Thangzaia kha an chang niin a ring a, a nau hnenah chuan:

Dar benvawn tak maw i chan,
Thangsira leh Thangzaia chan raw bei e,

a ti a. A u chuan lak a duh ta hauh lo mai a, a nau hnenah chuan, “Kal rawh, Lasir, i kal zel ang” a ti a, an kal ta zel a. An kal tak veleh chuan Thangsira leh Thangzaia chu mihringah an chang leh a, Lasiri te chu an tlan khalh leh a , mual let liamah chuan pakhat chu khawdur nasa takah a chang a, pakhat chu thlam thar tha takah a lo chang a. Ruah lah chu a sur dawn tep si a, a nau Lasiri chuan a hlau hle mai a, chu thlam
thar chu awm nan a it em em mai a, a u hncnah chuan:

Ai, ka u-i, ka u-i,
A he thlam thar hi a tha;
Awm ta mai mai tang ka ti,

a han ti a. A u chuan Thangsira leh Thangzaia niin a ring leh a, a duh lova.

Thlam thar nuam tak maw i chan,
Thangsira leh Thangzaia chan raw bei e,

a ti a. A nau hnenah chuan, “Kal rawh, i kal zel ang,” a ti a, chutichuan an kal zel a. Chumi hnu chuan Thangzaia te unau chu mihringah
an chang leh a, Lasiri te chu an tlan khalh leh ta a. Nakinah chuanThangsira chu tuipui lianah a chang a, Thangzaia kha dar leilawn tha takah a changa, luiah chuan a indawhkai zur mai a, chumi hmun chu Lasiri te khan an va thleng a. Lasiri chuan chu dar leilawn chu zawh atan a it ta em em maia, a u hnenah chuan:

Ai, ka u-i, ka u-i,
A he dar leilawn a tha,
Zawh ta mai mai tang ka ti,

a han ti leh a. A u chuan Thangsira te niin a rin avangin,

Dar leilawn tak maw i chan,
Thangsira leh Thangzaia chan raw bei e,

a ti a. Nimahsela, chu lui chu a helna an han zawng chiam thin a, an hmu zo ta hlawl lova, zawh loh theih a ni ta lova. A nau kha chuan dar benvawnahte a lo chan kha chuan lak zel a duh avangin ani chuan dar leilawn chu a han zawh chhuak zai zai a. Chumi hnu chuan a u chuan a han zawh ve a, nimahsela a lai a thlen dawn veleh leilawn chu a auh thawt thawt thin a, a zawh chhuak ngam ta hlawl lova. Nakinah chuan a nau chuan, “Ka u, ka paw mai ang che” a ti a, a u chu a han pua a, dar leilawn chu a han zawh ta a; a lai a thlen chuan a auh tuar tuar a, leilawn chu a laiah chuan a tliak a, tuiah chuan an tla dun ta a, a nau chuan tui chu a hleuh kai a, vaukamah chuan a thu a; a u erawh kha chuan a hleuh kai ve thei ta lova, a nau chuan:

Ka u, hleuh rawh,
Ka u, hleuh rawh,

a lo ti thin a. Nakinah chuan a nau chu Uleuhah a lo chang a, a u kha chu tuiah chuan a tla hlum ta a. Tun thlengin uleuh chu a la hram fo thin. Tin, chumi hnu chuan Thangsira leh Thangzaia kha mihringah an lo chang leh a. “Tunah chuan Lasiri te pawh an awm tawh si lova, mihring nih pawh a nuam tawh lo ve, thil dangah i chang mai zawk ang,” an ti a, a u chuan :

Nang hi e, nang hi c, arpaah i chang ang a,
Kei hi e, kei hi e, arnuah ka chang ang e.
Kumtin, kumtin, i khuang dun rial rial ang aw

an ti a. A nau chuan, “Aih i,” a ti a, ran engkim chu a han ti zel thin a, a nau chuan a engmah chu a duh ta lo zel a. A tawpah chuan:

Nang hi e , nang hi e, fartuahah i chang ang a,
Kei hi e, kei hi e, vaube ah ka chang ang a,
Kumtin kumtin i vul dun chik chek ang aw?

a ti a. A nau chuan, “Aw le,” a ti a, chutichuan fartuah leh vaube ah chuan an chang ta a. Tun thleng hian kumtinin fartuah leh vaube chu an
par hun a la inang ta fo a ni.