KEIMINGI LEH KHUALTUNGAMTAWNA

Khaw pakhatah hian lal a awm a, an lal chuan fanu hmel tha tak leh fapa pahnih a nei a, an fanu hming chu Keimingi a ni a, anmahni chu keimi an ni a . Chung lai chuan an khaw piahah tlangval hmel tha tak, huaisen tak, themthiam tak a awm a, a hming chu Khualtungamtawna a ni.

Vawikhat chu Keimingi te khuaah chuan a han zin a. Keimingi chuan an tualah hian thing a lo ek a, Khualtungamtawna chuan a han hmu a, hmel tha a ti em em a, Khualtungamtawna chuan a kiang a mite hnenah chuan, “Khi lai nula thingek khi tunge maw ni le?” a ti a. Mite chuan, “Kan lal fanu Keimingi a nih khi,” an ti a. Khualtungamtawna chu a thlenin turah chuan a innghat sawk sawk a, Keimingi te inah chuan a han leng ta a, Keimingi chu a hmangaih ta em em a, a nu leh a pa hnenah chuan neih atan a dil ta a; a nu leh a pa pawn chuan an lo remti a, Keimingi nen chuan an haw dun ta a. Tin, Khualtungamtawna chuan mi dang lakah fanu pakhat a nei a, chumi chu a nula fe tawh a. Khualtungamtawna chuan sa a kap thei em em mai a, an sa kah lu chu an bang laiah an tar teuh va, sakei lute pawh tam tak an tar a.

Vawikhat chu vawk an talh dawn a, Khualtungamtawna chuan Keimingi chhungte chu a chah ta a. Tichuan Keimingi nutate pahnih kha an kal ta a, Khualtungamtawna in chhung chu an va lut a, a banglaiah chuan sakei lute chu a lo intar thut mai a, an han hmuh chuan an rilruin an lainat hle mai a, zan chu alo thleng a, an han mu a, an mut hma chuan Khualtungantawna leh Keimingi chu an muhil bawrh bawrh mai a, an fanu erawh kha chu a muhil ve lova. Chhuatah chuan Keimingi nuta te kha an mu a, midangte chu an muhil vek tawhin an ring a, banglai a sakei lu intar chu an tah ta a.

Ka u aw nger ngur,
I dam laia ramsa i hawl a;
I thih hnua laibang i mawi,
Ka u aw nger ngur;
Thingthu aw tlum zuk,
Khualtungamtawna seh nan,

an ti an ti mai a. Chutia an ti chu Khualtungamtawna fanu khan a lo hre reng mai a, a hlau ta em em mai a, a zun a ti chhuak der a, “Ka pa, tho rawh, ka zun a chhuak e,” a tia. A pa chuan, “Va zung mai rawh, engmah hlauh tur a awin love,” a ti mai a.

Nimahsela, a fanu chuan, “Ka ngam lo, min hruai rawh,” a ti talh a. A pa chuan a va hruai ta a, pawn an thlen chuan a fanu chuan, ” Ka pa, kan mikhualte kha an tap a, ka hlau em mai!” a ti a, an tah hla chu a hrilh a, Khualtungamtawna chuan, “Zuk ni tak a le, hlau suh, kal rawh, i lut ang,” a ti a, an lut leh ta a. Mei an tuah eng a, an ditipah sazu awm hlei lo chu, “Khi pawh, khi pawh, an ti a, an perh an perh ta mai a. An mikhualte chuan an sch thei ta lova, “Nangni pafa chu cngti zia nge maw ni, zan laia sazu in perh in perh le?” an ti a. Anni chuan, “Keini zawng kan dan ve reng a nia,” an tihsan mai thin a.

A tuk chu khua a lo var a, Khualtungawmtawna chuan, “Khai le, ka vawkpa chu i talh ang u hmiang, nangni tlangval ngal chakah va luh chhuak ta che u,” a ti a. An ni chuan, “Aw le,” an ti a, an va luh chhuak a, hukin an um ta zawrr zawr a, chutih lai tak chuan Khualtungamtawna chuan an zakdawh tak maiah chuan a thalin a kap chat chat mai a, an thi ta a.

Chutia a nutate a thah tak avang chuan Keimingi chu a thinur ta em em a, Khualtungamtawna thih theihna tur ngawt chu a ngaihtuah ta a. Khualtungamtawna pawh chuan Keimingi’n a thihna tur ngawt a ngaihtuah tih a hre reng a, amah Khualtungamtawna chuan dawi a thiam em em a, Keimingi hnenah chuan, “Keiming nang engnge i duh ber, ka la ang e,” a ti a. Keimingi chuan a thihna tur ngei nia a rin chu a han sawi a. “Hmara Nghalphusen ngho ka duh ber,” a ti ta tlat a, Khualtungamtawna chuan, “Ka la ang,” a ti a, a ui a hruai a, a kal ta vang vang a . Hmara thing zawng zawng chu hmun khatah a dawi khawm vek a, phuanberh hi a lo dawi tel hmaih ta a. A dawi hnu chuan thingah a han lawn a , chang a han tum raih a, nghalphusen chu an lo chhuak dum dum mai a, Khualtungamtawna chuan a thalin alo kap zat zat mai a, thing
hrang hrangah chuan a tlankai zel a, a tawpah chuan pakhat chauh hi tihhlum loh a nei a, a thing dawi hmaih phuanberhah khan a tlankai hlauh va, a tliak a, a tla ta a. A ui hnenah chuan, “Va zualko ta lang mi tam tak an lo hawng anga, min han zawn dawn ang nga, thing lianpui puitein min zawn rawh se. Tin, kawngkaah min luh pui dawn anga, an thei lovanga, i kawngkaah min luh pui sela a tha ang . Tin, min zalh anga, hmunphiah kha thut bet tlat la, Keimingi’n hmun a han phiat dawn anga, ‘Ui a han ti ang che nga, a kaihza tha chhat ang che,”a ti a.

Ui chu zualko tur chuan a.kal ta vang vanga, mite chu a ko va, an lo kal teuh va, an han zawn dawn a, an zawn nan thing an han hmang dawn a, nimahsela, an zawnna thing chu a tliak hmawk thin a, a ui chuan a chungah chuan di a dah thin a. Mite chuan, “He ui hian engnge maw a hriat teh fo chu le di i dah teh ang, a chhan riau hi a lo awm ange,” an tia, an dah ta a. An dah hnu chuan a tliak ta lova, in chu an han thieng a, kawngkaah chuan an han zawn lut dawn a, nimahsela a leng thei ta lova, a ui chuan kawngka hnuai lam mawlh chu a pan a, a vir a vir mai a. Mite chuan, “Ngawi teh u, he ui hian kawngka hnuai lamah luhpui a ti a ni awm asin maw!” anti a, kawngka hnuaiah chuan an han rawlh a, an zawn lut thei ta zan a, a ruang chu an zalh ta ar mai a. Keimingi chuan pawi ti awm tak maiin a tah a tah mai a, nimahsela, a rilru chuan a nui a, a lawm hle a. Nakinah chuan Keimingi chuan hmun a han phiat dawn a, ui chuan a lo thut a, “Ui, i hnawk e,” a han ti a, ui chu a beleuh thawt a, a thawh zawng chuan Keimingi kaihza tha chu a han chhat thawt a, a tlanbo ta a. Khualtungamtawna ruang chu an phum ta
a, Khualtungamtawna ui chu chinghnia hi a ni a, sate a seh apiangin a pu thlana hnahkiah bulah chuan a thin leh a lung a dah ziah thin a.

Tun thleng pawh hian chinghniate hian seh an neih phawt chuan hnahkiah bulah a thin leh a lung an dah ziah thin an ti.