CHEPAHAKHATA
Chepahakhata hi tlangval hmelchhe tak a ni a, nupui pawh a hmuh zawh loh avangin rei tak nei lovin a awm a, a tawpah chuan nupui a hmu ta tawk a. A nupui chu dawithiam a lo ni hlauh va, changel hmun nasa tak hi khaw ropui deuhvah a han dawi ta mai a, anmahni chu lal an lo ni reng a, Chepahakhata chuan nuam a ti em em a, fanu an han nei a, a lawm hle a . Chepahakhata chu a va leng a, mite chuan an lo ti tha em em a, zu te an zuk a, rante an talh bawk a, a leng chuan hawn leh nachang a hre ta lova, rei tak a leng ta a.
A fanu kha thing phur thei a lo nia, a nu chuan a hnenah, “Chemte i pa leng a lo haw har em mai va ko rawh,” a ti a; a fanu chuan a va ko va, “Ka pa, lo haw rawh, ka nu in a ti e” ava ti a. Chepahakhata chuan, “Aw le,” a tia; nimahsela rei tak hnuah pawh a la haw duh chuang lova. A nupui chu a thin ur hle a, “Chemte, i pa va ko leh rawh,” a tia, “Ka pa lo haw tawh rawh, ka nu thin a ur hle a ni,” a ti a, a pa chuan, “Aw le, ka lo hawng ang,” a ti a.
Nimahsela a hawng duh leh ta chuang lova, rei tak a la awm ta a, a nupui chu a thin ur em em a, “Chemte i pa va ko leh la, a lo haw duh loh chuan kan kal bo daih dawn nia,” a ti a. A pa henah chuan, “ka pa, lo hawng tak tak rawh, i lo haw loh chuan, kan kal bo daih dawn e,” a ti a; Chepahakhata chuan, “Aw le, ka lo hawng tak tak ang,” a tia, nimahsela hawn reng reng a tum leh ta lova. A nupui chu a thinur a, an khuate zawng zawng kha changel hmunah a chantir leh ta vek a, an nufa chuan Pu Vana hnenah an chho ta daih a.
Chepahakhata muhil chu a han harh a, a awmna chu ramhnuai changel hmun hlir a lo ni ta a, “Ka mumang lam emaw ni chu le!” a ti a ti ta a. Nimahsela a mumang chu a lo ni si lova, ei tur nei lo chuan a vak a vak ta mai al Chutia a vak a vak chu van atangin a fanu khan a zuk hmu a, “Ka nu, ka pa chu riltamin khu a vak a vak mai,” a ti a . A nu chuan, “I khawngaih em chuan belte phai thei lo kha thlak ta che,” a ti a, a zuk thlak ta a. Chepahakhata chuan a riltam apiangin ei tur a nei thei ta fo va.
Vai lalpa khuaah hian a va kal a, a hmel a chhiat em avangin chu lal chuan a lo haw viau mai a. “Chepahakhat, chaw khawrhah inel ang, kei aia i khawrh tam zawk loh chuan ka tihlum ang che,” a ti a. Vai lal chuan a khuate chu chaw a chhum tir teuh va, an han khawrh ta a, tam tak an khawrh a, Vai lal chuan a khawrh zo thuai a, Chepahakhata erawh chuan a khawrh zo thei ta lova. Vai lal chuan, “A bel kha vuak keh sak daih rawh u,” a ti a, an vuak keh sak a, amah chu hmawng lerah an zep ta daih a. Chutih lai chuan a awmna thing ah chuan vaiva ho leh vakul hovin ro an rel ta a. Vaiva chuan Vai an tan a, Vakul chuan Zo an tan a. An thurel tur chu, “Mizo nge fing ang Vai?” tih hi a ni a, Vaiva chuan, “Vai chu an fing zawk ang. Nufa ni si inang reng an lo kal ang a, Mizo chuan a nu leh a fa zawk a hre lovang,” a ti a. Vakul chuan, “Chungte mai mai chu an pahnihin han vaw vak ila, a nu chuan ‘Awi chemte’ a ti ang a, a fa chuan, ‘Awi ka nu’ a ti ang chu,” ati a. “Bawng an rawn kai leh anga, a lu lam leh mawng lam hriat loh a ni anga, Mizo chuan an hre lovang,” Vaiva chuan a ti leh a. Vakul chuan, “Bawng chu an hnawt ang a, a lu lamah chuan an tlan mai ang chu,” a ti a. Vaiva chuan a dang a sawi leh a, “Thul a ke lam leh a chhip hriat hauh loh an rawn zawn ang a, Mizo chuan an hre hauh lo vang,” ati a, Vakul chuan, “An hria ang, thul chu a letling anga, a chhin chu a tla anga, an hre mai ang,” a ti a. Chung zawng chu Chepahakhata chuan a lo hre vek a, Savate chu an thlawk darh leh ta a.
An darh hnu chuan Vaiho leh Mizo ho chu fin inel turin an lo kal chiam a. Vaiho chuan, “Nufa inang reng an rawn hruai a, Mizo chuan a nu leh a fa chu an hre thei lo va. Chepahakhata pawh khian ring ve rawh se, an ti a, Chepahakhata chuan tiang a la a, a han vua a, a nu chuan, “Awi chemte,” a ti a, a fa chuan, “Awi ka nu,” i ti a, an hre ta a. Tin, Bawng a lu leh mawng lam hriat loh chu an rawn la Ieh a. Chepahakhata chuan a han hnawt a, a lu lamah chuan a tian ta a. Thul pawh chu an rawn zawn leh a, Chepahakhata chuan a han letling a, a chhin lam chu a tla ta mai a. Chephakhat avang chuan an hre ta vek a, an lawm em em a. Chepahakhata chu thing kak ah an zep leh ta lova.