CHEMTATRAWTA
Chemtatrawta hian tui tichip chiapah chem a tat rawt rawt a, Kaikuangin a mawngtamah a chep ta hlawk mai a. Tichuan, Chemtatrawta thin a ur a, a kianga Khaum zamna rawpui a sat fik zawk a, Khaum thin a ur a, a hnuaía Ramar tla chu a ngumah a deng khawl mai a.
Tichuan Ramar thin a ur a, Taivang bu a thai darh a; Taivang thin a ur a, Sanghal kapah a seh a; Sanghal pawh a thin a ur a, Bak awmna Changel a nghovin a tai thlu a; Bak thin a ur a, Sai hnarah a lut a, Sai a thinur a, Pitar te in a chil chhia a; Pitar thin a ur a, an khaw Tuikhur chu a tinu zo ta vek mai a.
An khua chuan an buai ta mur mur mai a. Pitar hnenah chuan, “Engatinge Tuikhur tlan lai i tih bawlhhlawh vek?” an ti a. Pitar te chuan, “Engatinge Saiin ka awmna in a chil chhiat?” a ti a, “Eng a ti nge Saia i chilchhiat? an ti a, “Enga tana ka hnarah Bak a luh ni,” a ti a.
“Enga tinge Baka Sai hnara i luh?” an ti a, “Enga tana Sanghalin ka awmna Changel a tai thluk ei,” a ti a; “Enga ti nge Nghala i tai thluk?” an tia; “Enga tan tan Taivangin min seh ei” a ti a, “Enga ti nge Taivang i seh?” an ti a, “Enga tan a Ramarin ka bu a thai chhiat ,” a ti a.
“Enga ti nge Ramar i thaichhiat?” an ti a, “Enga tana ka nguma Khaumin a den,” a tia, “Enga ti nge Khaum i den?” an ti a, “Engahnge Chemtatrawtan ka zamna rawpui a sah thluk” a ti a. “Engahnge Chemtatrawt i sah thluk?” an ti a, “Enga tana Kaikuangin ka mawngtama mi cheh ei,” a ti a, “Engah nge Kaikuang i cheh?” an ti ve leh a.
Kaikuang chuan chhuanlam tur a hre ta hauh lo mai a. A zahzel chuan, “I, i, ih, meiah min rawh ula, naupang lawmah ka sen vit vet ang, tuia mi thlak leh ka dang bim bem ang,” atia. Tichuan meiah an rawh a, a sen ta vit vet mai a, tuiah an thlak leh a, a dang ta bim bem mai a.
Pukah a lut a, “Nu leh pa khua chu nuam sing khaw,” a ti a, tuiah chuan a hleuh ta zek zek mai a. Hnahthial kungin an hawlh ta zek a , a hmuite chu an hawlh pawr sung mai a, chuvangin tun thleng hian Kaikuang hmui, hi a la pawr sung a ni, an ti zuk nia.