Thil bul – Pi pute ti ti – Part 4

TUI SANG LIAN (TUILET)

Hnehna ropui lawma ruai ropui theh kha Thlanrawkpa khan a tum sa kha a ni a, a khuangchawina selu lawk a hmu ta bawk a. Khuangchawi tlipna leh selu lawkna, leh hnehna ropui lawmna chu an hmang kawp ta vek a. Hemi tum hi chuan a puzawn, Sabereka pawh a sawm ta ngei a, Sabereka chuan pathian zawng zawng, huai zawng zawng a rawn kalpui ta vek thung a. Mi leh sa leh pathian leh huai pawh an kim ngei awm e, hlim takin mi tam tak an lam in ruai an theh a.

Mualbeuvan Mura kap e,
Buipuiin pangpar beh e,
Vawkek lam e su dim e,

Chungleng tlawm e dai duk e,
Vawkekin ar chang tawn e,
Hnuaileng lam su dim dim e,

tih hi an lam hla pui ber a ni.

Hetia hnuaileng chu hnehtu an nih a, hnehna lawmna ruaipui meuh an han theh dawn a, fatu hovin sa an han thur vel lai chuan sakhi hian a nghak hlel bik a, “Hak, hak hak,” tiin mual zawl tin leh kawtthler tina an sa thur vel chu a fang vel a. A chep lai laiah a lo tlan buai vei a, a tawpah chuan sakhi chu a chesual a, sa chhumna har a thuk duk a dai a, a na ti chu a tum a tum vel a, taham hnah a rap a, a tinsa avangin hnahah chuan a hniak chu a lang kiau mai a , tun thlengin taham hnahah sakhi hniak a lan kiau hi. Mitin, sa tin, nung tinrengin hlim em em. in ruai an theh ta mur mur a, Sakhi erawh chuan ke na a then teuhvin ruai a theh ta zuk nia. Hei hi a lawm tun thlenga Sakhi thuk duk dai i ang a, i tum i tum a, i zuang i zuang mai an lo tih chu ni.

Hnehtu an nihna chhuangin mihring ran vulhte pawh an induh riau ta mai a. An ran talh tum apiangin, “In duh duha in talh tur kan ni bik lo, kan tan rual avanga hnehtu chan chang kan ni, Vahmimte lam pawh hnehna ti chiangtu an nih kha,” an ti a, Ar pawh an talh thei ta lova. Thlanrawkpa nupui mangang chuan a pa Sabereka a pun a, “Rem min ruat sak rawh,” a ti a . Sabereka chuan, “Tun chin chu hnim hring leh rannung leh mihring in inbe thei tawh lovang, mahni chite chauh in inbe thei tawh ang,” tiin an tawng a tih hran sak ta vek a. Genesis 11:1-9 nen tehkhin la, Babel in sangsatute tawng tih hran sak nen a in ang thei awm e.

Mihringte, ramhuaite, pathian te, huai him hrim te pawh an inpawlin fate an hring thin kan tih tawh kha. An fa hrinte chu a hmei a pain mihring fa pangngai aiin an lian a , an fing zawk bawk a , an hmel a tha zawk bawk a. Hengho zingah hian nula lian tawk tak, hmeltha em em mai hi a awm a, a nu chu mihring a ni a, a pa chu khuavang a ni a; a hmu apiangin en nin theih loh khawpa hmeltha an ngaihzawn em em thin a nia, mi tinin an ngaihzawn avangin Ngaiteii an vuah a, a hming tak chu Tluangliani a ni a. Ruai ropui chhima lo kal ve Tuihuai tlangval pakhat hian a duh em em avangin nupui atan them dan tinrengin a thlem a, Ngaiteii Iah chuan a hnar tlat a, a duh ve thei reng reng si lo.

Ruaitheh Ieh lampui a tiak chuan Tuihuai tangval chuan man luih a, hruai hawn a rilruk ta a. Ngaite i chu a um ta chiam mai a, an in umna apiang chu tuilian in a chim put put zel ta mai a. Mi zawng zawng chuan chuan tlang sang lam an pan dual dual a, tuilian luang ri lah chuan, Ngai-Ngai-Ngai a ti zel a. ‘Ngaiteii puan kha tuiah khan paih teh u’ an ti a. An han paih luh chuan tui chu a kam duai duai thin a, a lo sang leh tual tual thin si a. “A tuibur kha paih lut rawh u an tia, an paih chuan a kam leh duak duak a, a rawn chim san leh chuan a bak a rawn sawn sang ta em em mai a. Thih zawh vek ai chuan, ‘Ngaiteii kha namthla rawh u’ an ti a , Tap tuar tuarin an namthla lui ta a, tui luang ri Ngai-Ngai ti thin pawh chu a reh ta duk a. Luipui lam panin tui chu a kam ta duak duak a, tui thuk lamah Ngaiteii chu a luh bo pui ta a, mitin mai chuan an sun a, a hmei a pain mittui tla lo pawh an awm lo.

Ngaiteii nu chuan engmah pawh a lem thei hek lo, a tap nileng zankhua hi a ni ringawt a. Chaw ei lovin a vak a vak a, a thih thloh atana a lem ber chu Zufang fian khat chauh ni khat atan a lem thei tawk a, Ngaite-hi! Chhim thlipui maw i tuar a, Khuangruah sur maw i tuar a, Ngaite-hi! ti a tap chung zelin chhak lam, thlang
lamah a vak a vak a.

A tan chuan in lum pawh a lum thei lova, thenrual pawh hnemtu an tling mawlh si lo. Nikhua a lo rei deuh hnu chuan, a ruhro tal ka chhar hlauh takin tiin a vak a vak leh ta a. Ruam lai tha deuh a chhehpawlte hi tiangin a thai a thai a, a hmu thei bawk si lo, a tap lah chu a khuiin a khui mawlh si lo, Ngaite hi, chhim thlipul maw i tuar a, khuangruah sur maw i tuar a, Ngaite-hi! ti hlirin a tap a tap tawp thei hek lo; hei hi tun thenga hmeichhe naupang pawnto in a lem an la chan thin hi zu nia. Chutia a vak a vak chuan Dampui ram khu a vak theng a, a tap mittui leh hnaptui chu reh thei hek lo. Ngaiteii ruhro lah hmuh tur awm bawk si lo. A ni lah beidawng thei bawk si lo, a vak a vak a, Dap chi an tih khur chu a theng a, a chheh pawl hai vel hah chu a han thu chawl a, a hnap a lo tui a, a hnit thawt thawt a, a hnap chu chi tuiah a chang ta a, Dap chi an tih khu Ngaiteii nu tap hnap a ni an ti alawm. Tichuan a vak a vak chu a thihna hmun pawh hriat lohvin a vak bo hlen ta daih mai a,
tumahin an chhui chhuakin an hmu chhuak zo ta lo.