Chala leh Thangi

Hmanlai hian Khawnglung khuaah Chala leh Thangi te an awm a. An naupan tet atanga inkawmngeih em em an ni a, nu leh pa thu pawh an awih dun em em thin a ni. Tichuan, an lo thanglian zel a, an hriatloh karah inhmangaih em em in an lo seilian a.

Chutia hlim taka an khawsak lai chuan, khawchhak lam atangin ral an lo lian a. Thangi chu khawchhak ral chuan an man ta daih mai a. Chala erawh chu an khaw rawn runtute lak atang chuan a tlanbo thei hram a. Mahse, Thangi an man tak avangin lungchhe em emin a tap a tap a.

Hmelmain Thangi an han man ta mai chu Chala tan chuan engti kawng zawng maha hriatthiam theih a ni lo.

Ama tawkin a inngaihtuah nep nep thin a, Thangi tello chuan nun hi engtihnamah a ni love, thih leh thih, engmahin min dal suh se hmelma ram pawh nise Thangi chu ka han zawng chhuak teh ang tiin, an khua a chhuahsan ta a.

Tichuan, khawchhak lam a pan ta mawp mai a, ralin an kalpuina hmun niawm a hriat lam te chu a pawng zawn ta tawp mai a ni. A mantute chuan Thangi chu lova hnathawk turin an lo chhawr a, lungleng em em in lovah chuan hna a lo thawk a. Chala a ngaihzia thu chu hlain a lo sachhuak fo thin a ni.

Nikhat chu chutia lova hna a thawh lai chuan thlam namthlak lamah a hahchawl lungleng leh khawhar bawksi chuan hla a lo sa a.

‘Min la ngai maw, min la hawi ve maw?
Ka lungdi Chala khan min la hawi ve maw,’

tiin a lo zai a.
A rin loh tak maiin Chala chuan chulai hmun chu a lo thleng ve der mai chu niin, a aw ri te a han hre leh chu a lung a leng em em mai a. Thangi zai ri a hriat chuan a aw atang ringawt pawh chuan thangi a ni tih a hre mai thei a, a zai chu hla bawkin a han chhawn ve a :

Ka la ngai che, ka la hawi ve che,
Ka rawn zawng che, mi tukram lovah.

Chutiang hla leh aw mawi tak chu Thangi chuan hriat a beisei ngai tawh lo reng reng a. Chala chu hmanhmawh takin a lokal a, inthlahlel tih hriat takin an inpawm vawng vawng a.

Tichuan, a rang thei ang bera hawng turin an insiam a. Tawng pawh an tawng ring ngam lova, an inngaihzia leh an inhmangaihzia thu chu zawite tein an sawi ser ser a.

Amaherawhchu, vanduaithlak takin an hawn kawngah chuan tui a lo lian chiam mai a. Thangi chuan amah mai chuan engtikawng zawng mahin a dai kai zo si lova.

Chala chuan ka kokiah hian vuan tlat la, tichuan ka hleuh kai pui ang che, a ti a.

Lui chu an kan dawn ta a, lui lai tak an thleng tawh tihah chuan chu nula vanduai tak mai chu a indawm nghet zo ta lova, lui laia tuilian khauh tak mai chuan a la ta vawng vawng a ni.

Chala chuan beidawng takin lui chu a kan thei hram a, ramhnuaiah chuan khawhar takin a vak a vak ta a. Thangi chu zawngin lui dung chu a suartluan thla a. Amaherawhchu, a hmu zo tawh si lo, a beidawn tawpah chuan in lam a pan ve ta nge nge a ni.

An khua a thlen chuan mite chu an lo hlim hle mai a, amaherawhchu, an hlimna boruak chu tem ve pawh a tum lo. Hrehawm ti takin a thu kun reng a, midang nena inkawm hlim zai reng a rel lo.

A hmangaih em em Thangi chu harsatna tam tak paltlangin a zawngchhuak a, a chhanchhuak bawk a. Amaherawhchu, hmelma laka a chhanchhuah hnuah tuilianin a laksak leh ta si. A mangang lutuk leh hrehawm ti lutuk chu Aw, ka duh ber chu tiau lui chuan min han laksak taka aw, ka hmangaihna zawng zawng pek ka duh laiin engmah a dawngsawng thei ta si lo, a ti vawng vawng a. Chutiang taka khawngaihthlak nula leh tlangval, Chala leh Thangi te inkara harsatna leh vanduaina hi thu lungchhiatthlak ber a tling.