Rairahtea

Rairahtea

Hmanlai hian fahrah rethei tak mai pakhat hi a awm a, a hming chu Rairahtea a ni a. Rairahtea chuan nuhrawn a hrawn a, a nuhrawn chuan a tiduhdah em em thin a. Hna hrehawm tinreng hi a thawhtir a, a hauvin a vaw fo va. Rairahtea chuan hrehawm a ti em em a, an in pawh chu nuam a ti lo va. Chutih lai chuan kawrpawlho lawng lian pui mai hi a tang a, a kal thei hauh lo mai a!! An lawng tang chu a kal theih nan mihringba inthawi an tum a, an inthawina tur zawng chuan Rairahtea te khua chu an lo thleng ta a. Rairahtea nuhrawn chuan pawisa kho te khatin a lo hralh ta mai a. Rairahtea chuan hrehawm a ti em em a, tlanbo daih a duh a, tlan bona tur a hre bawk si lo va. Tichuan, kawrpawlho chuan an hnungkhirha, an hruai ta a.

Rairahtea chu kawrpawlho chuan buh an ventir thin a. Kawrpawlho chuan lawng chu a tihkal nan ‘Bahhnukte’ an nei a. Chu mi hmang chuan an tikal mai thin a. Bahhnukte chu rulpui lianpui mai hian a ruksak a, chu rulpui chu thah tumin kawrpawlho chuan an zawng reng a. Ni khat chu rulpui, bahhnukte dawlhtu chu a hnu an hmu fuh a, an um chiam a. Rulpui chuan Rairahtea buh venna hmun chu a rawn thleng a, “Rairahte min hum rawh, ka hlau em mai,” a ti a. Rairahtea chuan, “E khai! I lian si a, I tlengna hnu pawh hrai hmun tiat tiatin a kaw rel rul mai a ni a, engtin nge kei tehlul hian ka hum theih ang che ni?” a ti a. Rulpui chuan, “Min khawngaih la min hum hram rawh,” a ti leh a. Rairahtea chuan, “Kawrpawlho lawng tang thawi nana ka nu min hralh ka nih hi. Thih hmabak theuh theuh chu kan thi mai ang chu le, lian hle lo la chu tihdan te pawh a awm tur a,” a ti a. Rulpui chuan, “Ka’n inti te ang e,” a ti a, a inti te ta vak a, buhtlei tiatin a han inti te a. Rairahtea chuan, “I la lian em mai, ka hum zo lo vang che,” a ti tlat a. Rulpui chu a han inti te leh ta vak a, tuibur dawn tiatin a han inti te a, ani chuan, “I la lian em mai, ka la hum zo lo vang che,” a ti leh ta a. Rulpui chu a han inti te leh ta vak a, hriau tiat lekin a inti te leh ta a. Rairahtea chuan, “Ti hi chuan ka hum zo em ang che chu maw,” a ti a, a sam zialah a vit phum ta daih a.

A thukru fel hman chauh tihin kawrpawlho chu an rawn thleng chawpchilh ve ta nghal mai a. “Rairahte, rulpui lo tleng I lo hmu em?,” an ti a. Rairahtea chuan, “Rulpui aw zawng ka hmu lo,” a ti a. Kawrpawlho chuan, “I zep a niang, I awmna chinah a ni, a hnu pawh a tawp ni,” an ti a. Ani chuan, “Ka zep awzawng lo ve,” a ti tlat a. Kawrpawlho chuan, “I hum a ni ang,” an ti lui talh a. Ani chuan, “Ka hum awzawng lo ve, chutianga rulpui lian te chu hum thei turin em ni min hmun ni?,” a ti a. Kawrpawlho chuan, “A ni dawn teh tak e, tirawh u, I kal ang u. Khua kan tlai mai mai e,” an ti a. A then chuan, “Buhfai kho khat pe ula rawn kalsan rawh u,” an ti a. A thenin, “Han beng ula rawn kalsan rawh u,” an ti a. A thenin, “Favai hram han pe ula rawn kalsan rawh u,” an ti bawk a. Mi dangin, “Han vel ula rawn kalsan rawh u,” an ti ve bawk a. Rairahtea chu an piai liam liam a, an kalsan ta a.

Kawrpawlho kal liam hnu chuan rulpui kha a lo chhuak a, lianpuiin a rawn awm leh ta a. Rairahtea’n a hum avang chuan a lawm em em a, “Rairahte, ka nunna min humsak ta si a, I duh duh min dil rawh ka pe ang che,” a ti a. A han luak ta vak a, thi te, dar te, tangka te a han luak chhuak ta ruih mai a. “Khang kha nei vek rawh,” a ti a. Rairahtea chuan a duh lo va, “Han ang vak teh,” a ti a. Rulpui chu a han ang ta vak a, a dang tawpah hian thil tle eng set set hi a hmu ta a. “I dang kil tawpa eng set set khi eng nge ni, khi khi a ni ka duh chu,” a ti ta mauh mai a. Rulpui chuan, “Hei hi alawm keipawhin ka duh a, ka tlanbo pui chu ni, nimahsela, ka nunna chhanhimtu I nih avangin I kawl rih mai a ni ang chu,” a ti a. An luak ta vak a, Bahhnukte chu a luak chhuak a, Rairahtea chuan a la a, Rulpui chuan a kawltir ta a. Rulpui chu kawrpawlho kal lohna lamah chuan a tleng bo ta daih a.

Rulpui kalbo hnu chuan Rairahtea chuan bahhnukte chu a keng a, “Ka pu Rulpuia thu, thu tak te, ka bahhnukte khua leh tui ka chanpui dawn meuh chuan, lawngpuho lawng tang zawng zawng khu inphelh vek rawh se,” a han ti a. Chu veleh lawng tang zawng zawng chu a inphelh ta vek a. Lawngpuho chu an lawm ta em em mai a, lawngpu pakhat hian a awmpui ta a.

Rairahtea chu a lo lian deuh deuhva tlangval nupui nei rual hi a rawn ni ve ta hial a. A pu chuan fanu pathum a nei a, fapa a neih loh avangin Rairahtea chu an duat theuh va. Ni khat chu Rairahtea chu dawhthlengah a mu ta tlat mai a, a pu fanu pakhat chuan mei a han chhem dawn a, Rairahtea a mut tlat avangin engmah a ti thei lo va. “Ka pa, hei mei ka chhem theih hauh lo mai, Rairahtea dawhthlengah a mu tlat mai si a,” a ti a. A pa chuan, “Nupui neih a ngen a nih chu, kan neihsak dawn nia,” a ti a.

Rairahtea nupui tur chu an ngaihtuah a. A pu chuan, “Rairahte, tunge I nupui atan chuan I duh le?” a han ti a. Rairahtea chuan, “Mahni tawkah Reng lal ngat le,” a ti ta mai a. A pu chuan a huphurh ta hle mai a, “Rairahte, Reng lal fanu em te chu, keini putu hian kan nei phak meuh dawn emaw ni le?” a ti a. Rairahtea chuan, “Keini putuin phu loh kan nei dawn em ni?” a ti ta tlat a. A pu chuan, “Chutia I tih tlat zawngin, han zawng i’n tum phawt ang hmiang,” a ti ve ta . A tukah chuan lawngpu chu Reng lal fanu dil tur chuan a kal ta a.

Reng lal in chu a lo ropuiin an lo veng uluk em em mai a, sipai thuah sarih hian an lo veng a. Rairahtea pu chu sipai thuah khatna chuan an lo bia a, “Eng nge I rawn tih dawn?” an ti a. Lawngpu chuan, “In lal fanu hi….,” a ti hman chauh va. Sipaiho chuan an man a, a lai takah an sat bung a, lal in bul luiah chuan an paih ta daih mai a. A pu chu a lo haw har tak em avang chuan Rairahtea chu a pu lam turin a kal ta a. Reng lal in a zuk thlen chuan a pu hmel reng reng a hmu ta lo va. ‘Sipai hovin an that ta ngei a nih dawn hi’ a ti a. A bahhnukte chu a keng a, “Ka pu Rulpuia thu, thu tak te, ka bahhnukte khua leh tui ka chanpui dawn meuh chuan, ka pu thi tawh hnu kha lo nung leh rawh se,” a ti a. A pu chu a rawn nung leh ta mai a. A pu chuan, “Heti ang a nih dawn phawt chuan ka kal leh mawlh ang,” a ti a. Lal fanu dil tur chuan a kal leh ta a.

Lal in vengtute chuan lawngpu chu an lo hmu a, “Eng nge I lo tih dawn?” an lo ti a. Ani chuan, “In lal fanu hi….,” a ti hman chauh va an mana an sat chhum a, luiah an paih leh ta mai a. A pu a lo haw har leh tak em avangin Rairahtea chu a pu lam turin a kal leh ta a. A rin ang ngeiin a pu chu an lo that leh hi a lo ni a. Rairahtea chuan, “Ka pu Rulpuia thu, thu tak te, ka bahhnukte khua leh tui ka chanpui dawn meuh chuan, ka pu thi tawh hnu kha lo nung leh rawh se,” a han ti leh a, a pu chu a rawn nung leh ta a. A pu chuan, “Ka kal leh bawk ang,” a ti a, a kal leh ta a.

Rairahtea pu chuan Reng lal in tual chu a zuk thleng leh ta a, lal in vengtute chuan an lo hmuh chuan mak an ti hle mai a, “He pa hian duh tha te a nei a ni ang nge!! Hawh u, I luhtir mai ang u, a lo kal zing em mai,” an ti a. An luhtir ta a. Lalpa chuan, “Eng nge I duh le?” a lo ti . Lawngpu chuan, “I fanu hi Rairahtea nupui atan kan duh a,” a ti a. Lalpa chuan, “In duh nak chuan in nei thei ang. Amaherawh chu naktuk ni chhuah hmain ka in hi rangkachak veka siam ni se la, a kiangah nunna tui luang rawh se, chu chu in tihtheih phawt chuan in nei ang,” a ti a. Lawngpu chu lungngai takin a haw leh ta a, in a thlen chuan Rairahtea chuan, “Ka pu, a rem dawn awm emaw chu” a lo ti a. A pu chuan lungngai deuh hian, “E….Rairahte, khutiang zawng kan phu rual a ni lo ve, I nei lo mai ang,” a’n ti te te a. “Reng lal chuan naktuk ni chhuah hmaa a in rangkachaka sa tur leh a sira nunna tui luantir turin min ti a, chutia kan tih theih chuan man lovin, lal fanu chu kan nei thei dawn a ni,” a ti a. Rairahtea chuan, “A nih tak chu,” a ti a, a mu ta daih a.

Rairahtea pu chu zing takah a tho va, Reng lal in sa tur chuan a insiam a. Rairahtea chu kaihthawh an tum thin a, a kaitho zo lo va, a mu lui tlat si a. Ni a rawn chhuak dawn ta mai a, a pu chuan, “Rairahte tho teh, ni a rawn chhuak tak ngial dawn e, Reng lal in chu kan sa zo hman lo va nge,” a ti a. Rairahtea chu muangchangin a rawn tho chhuak a, pawnah a va chhuak a, “Ka pu Rulpuia thu, thu tak te, ka bahhnukte khua leh tui ka chanpui dawn meuh chuan Reng lal in chu rangkachakah chang sela, a kiangah nunna tui luang bawk rawh se,” a ti a. A chham zawh rual chuan ni chu a rawn chhuak zui ta nghal a. Reng lal in chu rangkachakah a chang a, a tle sut a, a kiangah chuan nunna tui a luang tle ser ser bawk a. Niin a chhun chuan a tle sut mai a, Reng lal chu a a lawm ta em em a.

Rairahtea chuan a pu rulpui leh a hote a awmpui hlawm a. A hote chu an pi tur chu a tha awm emaw en turin a tir ta a. An pi thar en tur chuan Buipui, Chepa, Choak, Thehlei, Zawngte, Chaichim, Sazu, Sahuai, leh Zawhte te chu an inzui chhuak ta dam dam a. Reng lal in chu an zuk thleng a, an chhaih tan ta a. Sazu chu bang relah a han tlan lawn zung zung a, rappui chung sanga an bur dah chu a han tlawh thla thuai mai a. Lal fanu chu a thova a awmna ngaiah chuan a dah tha leh ta mai a. Zawngte chuan tuibur chu an hmuam a, tap chhakah chuan a pik puat a, lal fanu chu pawisa awm pawhin a awm duh lo va. Tichuan, an haw leh ta dam dam a. In an thlen chuan an pu chuan, “In pi tur chu a tha awm emaw chu,” a lo ti a. Anni chuan, “A nun a nem hle mai,” an ti a. Rairahtea chuan Reng lal fanu upa zawk chu a nei ta a. Nimahsela, lal fanu chuan vanah tlangval duh zawk a nei a, chu mi hnena kal dan mawlh chu a ngaihtuah a. Rairahtea chu bahhnukte a neih vang maia nei duh a ni a. A bahhnukte laksak dan mawlh a ngaihtuah thin a. Nimahsela, Rairahtea chu a fimkhur thiam em avangin a laksak thei lawk lo va.

Vawi khat chu an nupain luia inbual turin an kal a, Rairahtea chuan a inbual dawnin a bahhnukte chu lungpui chungah a dah a, chu veleh a nupui chuan a la thuai a, vanah a lawnpui ta daih a. Chu veleh Reng lal in vulna zawng zawng chu a chuai nghal ta vek a. Reng lal pa chu a thinrim ta em em mai a. A chhiahhlawhte chu Rairahtea a man turin a tir ta nghal a. Rairahtea chu an man a, Reng lalpa hnenah chuan an hruai a. Reng lalpa chuan, “Tun a china ni sawm leh ni riat chhungin ka in hi a ngaia I din leh loh chuan ka that ang che,” a ti a. Rairahtea chu a mangang ta hle mai a, a hote chu bahhnukte la tur chuan a tir ta a.

An pu bahhnukte la tur chuan ana inzui chhuak ta diah diah a, nakinah chuan lui an va thleng a, a lo lian nu phut mai a. Helna tur an han zawn ngial pawhin, helna tur reng reng an hmu zo ta lo va. A tawpa tawpah chuan an daikai thei ta hram a. An hah hle mai a. Lui kamah chuan an chawl a, chaw te an fak a. Choak hi lungpui chungah hian a fu vung a, a hah avangin a mu thlu lup lup a. A han bu lawp a, a han dak leh awr a. Chutia a dah lai chuan vana an pi leh a ngaihzawng inchhaih lai hi a han hmu ta hlauh va, a thiante hnenah chuan, “Vana khi kan pi a awm e,” a ti a. An vai chuan an han inrawn khawm a. “Engtin nge kan tih tak ang le?,” an ti a. Zawhte chuan khaidiat chher a lo thiam hlauh va, khaidiat chu an chher ta zung zung a, tam deuh mai a han chher khawm ta ruih mai a. Chutah, Buipui chuan, “Ak-a, nang han tlawmngai la, khaidiat hi vanah khian han bang te le. Pute thih ai zawngin chauh pawh a sawi theih loh a nih hi le,” a ti a. Choak chu van lamah chuan a thlawk chho ta ngar ngar a, vanah chuan khaidiat chu a han bang ta a, chu veleh Buia leh a hote chu khaidiatah chuan an lawn ta dam dam a, reiloteah an lawn thleng ta mai a. Chutia an lawn lai chu an pi chuan a lo hmu a, “E khai aw, khu ka bahhnukte la turin an lo kal a nih khu, engtin nge ka tih tak ang aw,” a ti a. A mangang ta hle mai a, a tih ngaihna hre lo chuan bahhnukte chu a hmuam a, a muthilh pui ta ngawt a.

Buipui chuan, “Thiante u, khi kan pi chuan a bahhnukte lah chu a hmuam tlat mai si a, engtin nge maw kan tih dawn le?,” a han ti a, an han inrawn khawm nak nak a. Sazu hnenah chuan, “Pute thih ai chuan nang Zu-a han tlawmngai langin, thih leh thih kan pi hnarah khian I meiin han hawlh la, a za ti chu a rawn hahchhiau ang a, bahhnukte chu a rawn phuh chhuak ang a, I lo chhar vat ang a, sut awngah I rawn chhuahpui daih dawn nia,” a han ti a. Sazu chuan, “Pu te thih ai chuan thih leh thih kan ti mai a ni ang chu,” a ti a, a pi mutna lam pan chuan a han kal ta tham tham a. A pi hnarah chuan a mei hmawrin a han hawlh nar nar a, a pi za ti chu a hahchhiau ta thuai mai a. Chu veleh bahhnukte chu a phuh chhuak a, rang fahranin Sazu chuan a lo chhar thuai a, sut awngah a rawn puh thlak pui a, an vai chuan an inzui chhuak ta dam dam a, hlawhtling inti takin an haw ta a .

An pi muhil chu a rawn harh a, a bahhnukte hmuam chu a awm ta lo tih a hriat chuan pawi a ti hle mai a. “He ti hi chuan ka thi ta a nih hi le,” a ti a, a indawm kun ta reng a. Buipui leh a hote chu hlim takin an kal ta sauh sauh va. An kal kawngah chuan tui a lo lian sen ta phut mai a, hel ngaihna an hre si lo va, daikai an tum ta a. Bui-a chuan, “Ak-a, nang bahhnukte hi keng ang che, chuti lo zawng a huh dah a nge,” a ti a. Ak-a chuan, “Tui chunga ka thlawh laiin ka thianten Ak, Ak, an lo ti noh noh anga, hram ve ka chak awm si a, engtin nge ka tih ang?” a ti a. Buipui chuan, “Chumi chhung chauh chu I insum hram hram a ni ang chu, pu te thih ai chuan le, hmuipui pu I nih hi,” a ti a. Lui lai a thlen chuan a thianteho chu an lo hram noh noh va, Ak-a chuan a thil put chu a theihnghilh ta a, “Ak,” a han ti a, chu veleh a bahhnukte chu a thlauh ta daih mai a. Tihngaihna an hre ta lo hle mai a. An vai chuan an han liluh thin a, a zawng an zawng a, nasa taka an zawn hnuah pawh an hmu thei ta chuang lo va.

An beidawng chu vaukamah an thu ngui nghiai hlawm a. Zawngte tui hleuh ning chu vaukama lungpui chungah chuan a thu a, a muthlu lap lap a. Chutia a muthlu chu a han bu dawrh a, li laia sangha chu aahan hmu ta a. Zawngte chuan, “Khuta khu sangha puar deuh mai ka hmu e, khu sangha khuan bahhnukte kha a dawlh a ni ngei ang,” a ti a. An vai chuan sangha man tur chuan an han liluh leh ta a. Sangha chu an han hual a, an man ta hlauh va. Sangha pumpui khei tur chu an invan hle mai a, a tawp tawpah chuan Buipui chuan, “Nang Ak-a, hmuipui puah I hmuiin a ril i khei ang hmiang,” a han ti a. Choak chuan, “Ka hmui te hlir hlir mai, a na tawh viau a nia,” a ti a. Buipui chuan, “Pu te thih ai chuan han tuar leh hram hram rawh khai,” a ti tlat a, Choak chuan sangha pumpui chu a’n khei ta a. Bahhnukte chu a lo dawlh ngei a, a khei chhuak ta a. A huh avangin lungpui chungah chuan an pho ro leh rih a. Chutia an pho lai chuan muvanlai hi a lo thlawk a, a hram lauh lauh reng a, an bahhnukte pho lai chu a rawn la daih a, vanchung sang takah a thlawh pui ta daih a. An mangang leh ta em em mai a, tihngaihna reng an hre leh ta lo va, an indawm kun nghiai hlawm a, “Kan pu chu a thi ta zuk ni a le,” an ti a. Hrehawm an ti em em theuh va.

Chutia an thut ngui nghiai lai chuan Safe nupa hi an lo kal dun zan zan mai a. Buipui chuan, “Fia-ate hi van chung sanga leng muvanlai pawh ti tla thei hlei lo,” a lo ti a. Safe nupa chuan, “Khing mai mai te chu tihian kan kawk tla mai alawm,” an ti a, Muvanlai lenglai chu an han kawk a, a rawn tla thla ta vawn vawn a, Safe chuan a tum ta chat chat a, a thi ta a. A sa chu an insem a. Buipui leh a hote chuan a pumpui an chang a, an lawm hle mai a. A pumpui khei an han tum leh a, Buipui chuan, “Khai le, nang Ak-a, I hmui I thawh leh mai a niang chu,” a han ti leh a. Choak chuan, “Kei a hmui hlir hlir chu, a na tawh viau asin le,” a ti leh a. Buipui chuan, “Pu te thih ai chuan I tuar leh hram hram a ni ang chu, han tlawmngai leh hram mai rawh khai,” a ti a. Choak chuan phun nuah nuah chungin a’n khei leh ta nge nge a, bahhnukte chu a la chhuak leh ta a, pho pawh pho ro ngam tawh lovin an kalpui leh ta a.

Reng lalpa hun tiam kha a ral dawn avangin lal in vengtuteho chuan Rairahtea chu an lo man a, thah mai tumin an lo din hual luai luai a. Rairahtea chuan, ‘Ka thi tawh ngei dawn a nih hi’ tiin chhuat dungah chuan a let a let a. Chutih lai chuan Buipui leh a hote chu an lo thleng a. Mi an tam em avangin inah chuan an lut ngam lo va. Engtin nge kan tih tak ang tiin an inrawn khawm nak naka. Bahhnukte chu an pu an pek ngei a ngai si a. Sazu chu an han tir a, ani chuan,“Mipui an tam si a, min lo rap hlum mai ang,” a ti tlat a, an han dawn vel a, awm an tihpui hle a. Buipui chuan Zawhte chu an tir leh a, a ngam bik lo va. Nimahsela, Buipui chuan, “Kan zingah hian nang lo chu kan pu hnen han thlen thei an awm lo, nang chu tap lum nghak thang I ni a lawm, engtin mah an lo ti lo ang che, tap lum nghak tum awm takin han kal la, kan pu lo leh pheina lai tak turah han dah zauh la a tha ang,” tiin a tir lui ta tlat a. Zawhte chuan, “A nih le, pu te thih ai chuan thih leh tih kan ti mai a niang chu,” a ti a. Bahhnukte chu a keng a, a han lut ta tham tham a. A pu lo leh pheina turah tak bahhnukte chu a han dah ru ta zal zal a. Rairahtea mangang let kual vel chuan bahhnukte chu a delh ta a. Engin emaw dovin a hria a, a han en chuan bahhnukte a lo ni reng a. A lawm ta em em a, Rairahtea chu a tho ta vat a. Rairahtea chuan bahhnuktek chu a la a, “Ka pu Rulpuia thu, thu tak te, ka bahhnukte khua leh tui ka chanpui dawn meuh chuan thosi favai thap angin lo leng rawh se,” a ti a. Chu veleh thosi chu favai thap ang maiin a leng ta thawt thawt mai a. Rairahtea thah tuma nghaktute zawng zawng chu an awm thei ta lo va, an haw zo ta vek a. Rairahtea chu tui takin a muhil ta bawrh bawrh a.

Khua a rawn var a, Rairahtea chu muangchangin a rawn tho chhuak a, amah thah tumtute chu an lo zi nuk nuk tawh a. “Ka pu Rulpuia thu, thu tak te, ka bahhnukte khua leh tui ka chanpui dawn meuh cuan, Reng lal in khu rangkachakah lo chang sela, a kiangah nunna tui lo luang rawh se,” a han ti leh ta a, Reng lal in chu a sawi ang ngei chuan a lo awm leh ta a. Lalpa chu a lawm leh ta em em mai a. Nakinah chuan Rairahtea chuan, “Ka pu Rulpuia thu, thu tak te, ka bahhnukte khua leh tui ka chanpui dawn meuh chuan, vana Reng lal fanu leh a tlangval khi lo tla thla rawh se,” a han ti a. Van atang chuan an rawn tla thla ta nawl nawl a. Lal in tualah chuan an rawn insawhhlum ta a. Mipuiho chuan mak an ti hle mai a, an haw zo ta vek a. Reng lalpa chuan, “I nupui a lo sual em a tin ni, a nau hi nei leh mai ang che, a ni zawng a u angin a sual ve tawh lo vang,” a ti ta a.

Rairahtea chan Lal fanu naupang zawk chu neih a tum ta a, a hote chu an pi thar tur chu a fel dawn emaw en turin a tir leh ta a. Buipuite ho chu an pi thar tur en tur chuan an inzui chhuak leh ta dam dam a. Lal in an thlen chuan an pi tur chuan la a lo kai a. An pi hmasa ai chuan a hmeltha zawk fein an hre lawm a. Zawhte chuan tungchawa tuibur chu an hmuam a, chu veleh lal fanu chuan a man lawk a, a hmai chu a tah biak sak ta vek mai a. Chumi hnu deuh chuan Thehlei leh Sazu chuan thehlana bur chu an han tlawh thla leh thuai mai a, lal fanu chuan a man leh lawk a, an hmui chu a tah zum sak ta vek a. Tun thleng hian Sazu leh Thehlei hmui chu a la zumin, Zawhte hmai pawh a bial ta reng a ni. Tichuan, lungawi lo zetin an haw leh ta a. In an han thlen chuan Rairahtea chuan, “In pi thar tur chu a tha awm emaw chu?” a lo ti. Anniho chuan, “Tha awm lo , a thin a chhe em mai, hei hmui a hlei, hmai a hlei kan put tawh loh hi,” an ti a. Rairahtea chuan, “Tiang mi hi an rilru a tha duh hrep a nia,” a lo tihsan mai a. Tichuan Reng lal fanu naupang zawk chu a nei ta a.

Rairahtea te nupa chu an inkawl rei tulh tulh a, an hlim dun deuh deuh va, tu dang mah an ngai ta lo va. Buipui chuan, “Khai le, ka pu, tunah chuan engmah buaina I tawk tawh em lo vang chu. Kan pu Rulpui hnenah kan hawn leh tang nge,” a ti a. Rairahtea chuan a bahhnukte kha a pe a. Tichuan Buipui hote chu an inzui liam ta diah diah a. Nikhua a lo rei deuh deuh va, Rairahtea chu a lo rethei ta em em mai a. An khuaah chuan tam nasa tak a tla leh nghal a, a nuna han nun theihna ziazang a nih tak loh avangin a nupui rai teuh nen chuan pan lam tur bik pawh hre lovin an chhuak ta ringawt a. Chutia an kal lai chuan ni a sa si a, a nupui chu a tui a lo hal ta em em mai a. Rairahtea chuan tui a zuk chawi sak a, a tui zuk chawi chu kawrpawlho tuikhur hnar a lo ni a, a rah nut vek avangin Rairahtea chu an man ta daih a. “Min chhuah rawh u,” a tih lawm lawm pawhin an chhuah duh lo va. Hriat ngai loh ramah an hruai ta daih a.

Chhawnabawrahza

Rairahtea tuichawi chu a lo let har tak em avangin Rairahtea nupui chu a mangang ta hle mai a. Chu tih nak alai chuan nau a vei zui leh ta nghal a. Ni sensa hnuaiah chuan nau a hring ta a. Fapa duhawm tak mai hi a hring a, nau a hrin fel hnuah pawh a pasal chu a rawn let leh tak loh fo avangin Kawrpawl hovin an man a nih ngei a ring a. A tui lah chu a hal tulh tulh mai si a, a fapa hrin hlim chu a mut a, tuikhur a thlen chuan a pasal chu Kawrpawl hovin an man ngei a ni tih a hre ta a. A pasal awm ta si lo cu a mangang zual sauh va.

Chutia tui a chawi hlan chuan, tuma enkawl lohva nausen leng bat bat chu Vanchung nula hian a lo hmu a, tha a ti em em mai a. Lawm a chak ta tlat a. A en reng lai chuan nausen chu a rawn nui ver ver a, Vanchung nula chu eng dang mah ngaihtuah lo hian, a nui ta hawk hawk a. A thiante chuan, “Engtizia nge, I nuih tak mai?” an ti a. A ni chuan, “A, khuta nausen mahni chauhva awm khu a lawmawm em a, min tinui a ni.” a ti a. A thiante hnenah chuan, “Nausen mahni chauhva awm ta chu a khawngaihthlak awm em a, siamah ka duh a ni,” a ti a. A thiante chuan, “Zuk siam la ti nia,” an ti a. Vanchung nula chu lei lamah a a thlawk thla a, nausen bulah chuan a tum a, nausen henah chuan, “I hming chu Chhawnabawrahza a ni ang a, I chalah ni leh thla a chuang a, I tah chuan I mittuiah rangkachak a luang chhuak ang a, I nuih chuan tangka I phuh chhuak ang. Nakinah I nu tui chawi a lo hawng ang a, lo hrilh ang che. Tin, lui khu in kan dawn chuan I nu chuan pua che se la, puakpuan hmawr hi tuiah chiah se la, hmalam pawn tial tial, hnunglam thuk tial tial, ti zel rawh se. I nu hnenah chuan engkim I lo hrilh vek dawn nia,” a ti a. Nausen chuan a lo en kiau va, Vanchung nula chuan van lamah a thlawh chhohsan leh ta a.

Nakinah chuan a nu tuichawi chu a lo hawng a, fiah zet mai hian a lo en kiau va, a tawng ta reuh va, “Ka nu, ka hming chu Chhawnabawrahza a ni a, ka chalah ni leh thla a chuang a, ka nuihin tangka ka phuh chhuak ang a, ka tahin ka mittui rangkachakin a luang ang. I nu chuan lui a kan dawnin puakpuan hmawr tuiah chiah se la, hmalam pawn tial tial, hnunglam thuk tial tial, ti rawh se, tiin min siamtuten min hrilh a ni,” a ti ta mai a. A sawi lai chuan a nu chuan mak a ti em em mai a, a lawm em em bawk a. A tawng chu hriat leh a chak a, “Eng a ni Taite? Han sawi leh teh,” a ti a. Nimahsela, nausen te chu a tawng leh thei ta lo va. A thusawi avang chuan a nu chu a hlimin a lawm a. A natna zawng zawngte chu a kiang ta vek a. A rilru hahna zawng zawngte pawh a reh ta vek a.

Phur takin a insiam a, a kawng zawh lai chu a zawh ta hnak hnak a. Nakin deuhvah chuan lui lianpui mai hi an thleng ta a. Daikai theih hmel pawh hi a pu lo va. Chhawnabawrahza nu chuan a fapa thusawi kha a hre reng a, naupuakpuan hmawr chu tuiah chuan a chiah zel a, “Hmalam pawn tial tial, hnunglam thuk tial tial,” a ti zel a. Tichuan harsa lo takin luipui chu an kan thei ta mai a. An kal zel a, nakinah chuan khaw ropui tak mai hi an thleng ta a. Thlenna tur hre lovin an tei an tei a. Veng hmawra hmeithai inah an thleng ta ngawt a.

Hmeithaite chuan Chhawnabawrahza chu a awm a, a nu chu ni tin hian a feh thin a. A feh dawn apiang hian a nu chuan, “Ka pi, ka nau hi lo ti nuiin lo titap hauh suh ang che,” a ti thin a. Pitar chuan a sawi ang tak chuan a tinuiin a titap ngai hauh lo va. Vawi khat chu pitar chuan, “Vawiin chu ka lo titap ang a, ka lo tinui teh reng reng ang, engtin nge a awm teh reng,” a ti a. A nu kal liam veleh chuan Chhawnabawrahza chu a han vel ta a, a mittui chu rangkachak tuiin a luang ta ngiai ngiai mai a, mak a ti hle mai a. “E khai, nautha a nih hi le,” a ti a. Naute chu thlem ban nan artui a chhumsak a, artui chu chhuatah chuan an lum vel a, a tap chu a bang a, a nui leh ta hawk hawk mai a. A nuih zawng chuan tangka a phuh chhuak ta uai uai a, chu veleh pitar chuan, “E khai, nau tha nau tha, hetih vang hi a lo nih hi a nuin tihtah a phal lohva, tihnuih a phal loh ni,” a ti a. A paw lawk a, a tlanbo pui ta daih a. Tlaiah chuan Chhawnabawrahza nu hnathawk chu hah leh chau tak maiin a lo hawng a, an in chu a lo ruak huai mai a, a fapa leh pitar chu an lo awm ta hauh lo mai a. “E….a lo tinuiin a lo titap a nih hi, a van pawi tak em ve aw,” a ti vawng vawng a. A fapa zawng tur chuan a chhuak ve ta nghal a. Rei tak a zawn hnu chuan a ngaihna reng reng a hre ta lo va. Hmeithai pitar inah khan lungngai leh khawhar takin a kir leh ta a, amah chauhvin a awm ta mai mai a.

Pitar khan Chhawnabawrahza chu ram hla takah a tlanbo pui ta daih a, ama fapa angin a nei a. Chhawnabawrahza chu a lo thanglian zel a, a lo tlangval ta a. Tlangval hmeltha tak leh huaisen tak a ni a, a fing em em bawk a. A rualpui zingah tuman an tluk lo va, lal ropui tak a lo ni ta hial a. Tuma neih ve loh sakawr thlaki sen nufa duhawm tak a nei a, a hming a lar phahin a ropui phah hle a. Pitar lo kha chu nu dang a nei ang tih ngaihna reng reng a hre lo va. A nu khan beidawng lovin a phak ang tawk tawkin a zawng reng a, mi ka atangin Chhawnabawrahza lal ropui tak a awm tih a hria a. A lawm em em mai a. A hnena zin turin a kal ta a. Chhawnabawrahza chu a va hmu ta ngei a, a lawm em em a, a nu a tih a inhriattir nghal mai lo va. “I nu ka ni a,” han ti ngawt sela, Chhawnabawrahza chuan a lo awih ngawt dawn si lo va. Rilru inbuan reng rengin a awm a, Chhawnabawrahza inah chuan mikhual thlenin a thleng ta rih a.

Zanah chuan inhnuaia sakawr thlaki sen nufa chu an inhrilhru a, sakawrpui chuan a note hnenah chuan, “Ngawi teh, Chhawnabawrahza pawhin a nu a hriat loh chu!” a han ti a. Chhawnabawrahza chuan a lo hria a, mak a ti rilru hle a. ‘Ka mikhual pitar hi ka nu a lo ni reng emaw ni le,’ a ti rilru a. A inngaihtuah nasa ta mai a. A tukah chuan Chhawnabawrahza chuan a mikhual pitar hnenah chuan, “Ka nu I ni elo?” a ti ta phawng mai a. Ani chuan, “Ni e, Taite. Nang hi ka fapa I ni a, kei hi I nu dik tak chu ka ni e, hun reitak chhung ka zawng tawh che asin,” a ti a. Chu veleh pitar kha a lo tawng thuai a, “Eng thu nge maw I sawi tak mai le, he nu hi hmuh pawh I la hmu ngai si lo va. I sen tet a lo chawi liantu che ka ni si a, min hai ta mai em ni le?” a ti a. Pitarte chu an inhnial buai ta chiam a. An inbakkaih titih ta mai a. Chhawnabawrahza chuan, “Aw le, tunah hian ka fiah ang che u, ka nu tak tak leh tak tak lo chu ka hre thuai mai ang. Kawngka lamah ka ding ang a, nangni pahnih in char lamah in ding ang. Kei ka lo ang reng ang a, ka ka chhungah ngei lut turin hnute tui in insawr siak ang a, ka ka ngei a lo chik luhtir theitu chu ka nu tak in ni ang,” a ti a. Chhawnabawrahza sawi ang chuan an han ti ta a. Pitar khan a han sawr hmasa a, a hnute chu ngil takin a kal phei char char a. Chhawnabawrahza ka a thlen dawn veleh a kawi tlat zel a. A awmah te, a hmaiah te, a banah te a chik berh ta phung a. Mikhualnu chuan a han sawr ve ta a, a kal kawi hle a, nimahsela, a ka a thlen dawn veleh ngil takin a kal a, a ka chhungah ngei chuan a chik lut ta zar zar a. Mikhual nu hnenah chuan, “Ka nu tak I lo ni ngei e,” a ti a. An inkuah vawng vawng a. Pitar hnenah chuan, “Nang, ka nu tak ni hlei lo rei tak chhung ka nu I lo timangang a, dam tlak pawh I nih loh hi,” a ti a. Pitar chu a sat chhum ta hmawk a. Luipui a lenbotir ta daih a. A nu nen chuan hlim takin an awm ta a.

Ni khat chu Chhawnabawrahza chuan, “Ka nu, pa hi ka nei ve emaw chu?,” a ti a. A nu chuan, “Nei e le, I pa chu a tirah chuan hausa tak leh thiltithei tak a ni thin a, nimahsela, a lo rethei ta em em a. Kan ramah tam nasa tak a lo tla vei nen, pem a lo ngai ta a. Ka pai lai che hian kalkawnga kan kal laiin, ka tui a lo hal ta a. Tui chawi tura a kal chu, Kawrpawl hovin an lo man ta a. Nang hi ka hring ta che a, pitar hnenah khan kan awm a. Ka hnathawh hlanin a lo tlanbopui ta daih che a, nasa taka ka zawn che pawhin ka hmu zo ta reng reng lo che a. Ka hmuh leh ngei che ringin beidawng lovin ka zawng reng che a, a tawp a tawpah chuan ka hmu leh ta che a ni hi. I pa chu Kawrpawlho salah a awm ngei ang a, dam pawh a la dam meuh ang e mawi chu le,” a ti a. An nun hlui liam tawh hnu zawng zawngte chu a hrilh ta vek a. A nu tawrhna nasatzia te chu a ngaihtuah a, a nu chu a hmangaih zual sauh va. Duat namen lovin a duat ta a.

Chhawnabawrahza chuan a pa zawn chhuah tum chuan vaiho chu a chah khawm ta chiam a. Vai lal ropui tak takte chu an rawn zawn nul nul hlawm a. An nufa chuan an lo thlir reng a, “Ka nu, ka pa chu a lo tel ve tawh em?,” a ti thin a. A nu chuan, “Tel lo,” a ti zel a. A tawp a tawpah chuan hrenpereng chhete kaih hian a lo kal hne hne a, a nu chuan, “Khu ta khu I pa chu ka hmu e,” a ti ta hlut a. Chhawnabawrahza chuan a zuk man ta thut mai a. Ani chuan a hlau em em mai a, a tal vak a, a tal chhuak a, a tlanbo ta daih mai a. Chhawnabawrahza chuan a zawng a zawng a, a hmu thei ta lo va. A beidawng duh bik lo va, vaiho chu a chah tah leh ta a.

Vaicho chu an lo kal leh ta nguah nguah a. Chhawnabawrahza te nufa chuan an lo thlir reng a, a tawp a tawpah chuan a pa chu a hmu fuh leh ta hlauh va. Chhawnabawrahza chuan a pa a hmuh veleh chuan a chhip samah nghet takin a man a, ani chu a han tal laih laih thin a, nimahsela, a tal chhuak zo ta lo va. A hlau em em mai a, a khur a khur mai a, “Ka pu, hetah hian min that law law mai rawh,” tiin a dil chiam a. Chhawnabawrahza chuan, “Ka that dawn lo che,” a tih pawhin a awih thei lo va. A khur zawih zawih a.

Chhawnabawrahza chuan, “Hlau suh, ka tina dawn lo che, ka inah ka hruai dawn che a ni,” a ti a. Ani chuan hlau leh khur chungin, “Ka pu, I in hmu tlak pawh ka ni lo ve, min chhuah mai rawh,” a ti tlat a. Rei vak lo an inkaih hnu chuan lal in ropui takah chuan an lut ta a. Inchhung an luh chuan thutphah nuam takah an thuttir a, chaw leh sain an hrai puar a, thawmhnaw tha ber ber an haktir a. Chhawnabawrahza chuan, “Kei hi I fapa ka ni alawm,” a ti a. Ani chuan a awih duh chuang lo va. Chhawnabawrahza chuan a nu chu a ko lut a, an han inhmu chu Rairahtea chu thlarau hmu ta ang mai hian a meng awn awn a. Reiloteah hlim leh lawm em emin an inkuah ta vawng vawng a. Thil awm dan zawng zawng chu an inhrilh tawn a. An sawi hlei thei lo va, an hnuk a ulh a, an han tap leh rih thin a. Hlim takin an awm ho va, Rairahtea chu rei tak chhung a cham a, nakinah chuan a hawng ve leh ta a.

Chhawnabawrahza chuan nupui neih zai a rel ve ta a. Ngaihzawng hmeltha deuh mai pakhat hi a nei a, hmelthain fel hle mah se la, an retheih em avangin lalin a han neih meuh atan chuan an iaisak tlat a, an khaw thenawm lawka lal fanu hmeltha tak chu nei turin a nu leh a khuate chuan an ti a. Nimahsela, an khuaa nula hmeltha tak, mirethei fanu chu a duh tlat avangin a nei ta zawk a. Fa pahnih hmeichhia leh mipa a nei a, mipa hming chu Rengtea a ni a. Chutia hlim taka an chhungkua an awm ho dial dial chu ramhuai tur nei hian a itsik ta tlat a. Tihchhiat dan mawlh a ngaihtuah a. Rangkachak sakhiah a chang a, khuaah chuan a lut ta zen zen mai a. Chhawnabawrahza chuan a lo hmuh chuan man atan a it ta tlat a. A sakawr thlaki sen nen chuan an um ta vak a. An umphak lek lek thin a, man theih loh tawkin a awm leh thin a. Man theih loh deuh si hian a tlan a tlan a. Mual let liamah hian sakhi chu putarah a lo chang a, Chhawnabawrahza chuan, “Ka pu, sakhi tlan I lo hmu em?,” a ti a. Putar chuan, “Hmu awzawng lo mai,” a lo ti a. An hmuh loh laiin Sakeiah a chang a, Chhawnabawrahza inring lo lai chu a bei thut a. A ei zo ta vek a. A ei zawh hnu chuan Chhawnabawrahza lemah a chang a, a thawmhnawte chu a inbel vek a, a sakawr chungah chuan a chuang a. Chhawnabawrahzate in lamah chuan a kal ta a.

Rengtea

Chhawnabawrahza a ei hnu chuan Ramhuai tur nei chuan a nupui leh a fate chu ei a tum leh ta a. Chhawnabawrahza lemah a chang a. Sakawr thlaki sen nei chuan a pi chu a hrilh ru a, “In pa kha Ramhuai tur neiin a ei zo vek a, tunah hian in pa lemah a chang a, I faten ei tur an dil pawhin aman a keih hmasa zel mai ang,” a ti a. Ramhuai tur nei chu that hmel deuh hian a awm a. A fate chuan, “Ka pa sarep min pe rawh,” an han ti a. Ramhuai chuan a hrang zat ve a keih thla hmasa zet a, “Kha u,” a ti a. “Ka pa buhtlang min pe rawh,” an ti a, a chanve a keih thla a, “Kha u,” a ti zel a. An pa khawsak dan chu mak an ti rilru hle thin a.

Chhawnabawrahza nupui chuan Ramhuai tur nei an kawl a ni tih chu hre mah se la, tih ngaihna a hre chuang reng reng lo a, a tha en liam ve mai a. Nakinah chuan Chhawnabawrahza nupui chu a ei ve leh ta mai a. Rengtea leh a farnu chuan hrehawm an ti ta em em mai a. An sakawr thlaki sen nei chungah chuan an chuang a, an nu leh pa hova an ram fan thin te kha an fang vel a, an lung a leng em em mai a, an tap an tap a, an mittui dawh nan darthleng an keng ve ve a, an mittui chu dartlengah chuan a leng ta lo va, a liam ta zawih zawih a. Sakawr thla chu an mittui tla chuan a luan zawp ta a, sakawr chu a thlawk hlei thei ta lo va. A tawp a tawpah chuan a tla ta nge nge a. An tlakna chu Ramhuai tur nei liamkawn hi a lo ni hlauh va. Sakawr chuan, “Rengte, kan awmna hi hmun hlauhawm tak mai, Ramhuai tur nei kawn a ni a, nakinah a lo kal ang a, kan insual ngei ang a. Buhfang tia lek pawha ka pem vaih chuan ka thih pui ngei dawn a ni. Kulh lo siam la, a rawn kal tlang theih loh takin,” a ti a. Rengtea chuan kulh chu a siam ta tlat tlat a, a siam rinawmin a siam tha ve hlein a inhria a. Zanah chuan Ramhuai tur nei chu a lo kal ta ngei a. Kulh chu a rawn thiat buan buan a, a thiat zo lo deuh va, a hawsan ta rih a.

A tuk khua a lo var a, Rengtea chuan kulh chu a siam tha leh ta tlat tlat a. Zanah chuan Ramhuai chu a lo kal leh ta a. Rengtea kulh siam chu a rawn thiat leh ta buan buan a, a thiat zo ta mai a. Sakawr thlaki sen nen chuan an insual ta a, rei tak an insual hnu chuan Ramhuai tur nei chuan a tinsan a. Sakawr thlaki sen chuan, “Rengte, min han en vel teh u, ka lo pem reng ang e,” a ti a. An unau chuan an han en vel chiam a, engmah an hmu lo va. A zan lehah chuan Ramhuai tur nei kha a lo kal leh ta a. A zan hmasa aia nasa zawk mahin an insual leh ta chiam a. Rei tak an insual leh hnu chuan a tinsan leh ta a. Ramhuai tur nei a kal bo hnu chuan, sakawr thlaki sen chuan, “Rengte, min han en vel teh u, min lo hliam reng ang e,” a ti a. Rengtea te unau chuan an han en vel a, a hnungzangah hian buhfang tia lek tak tak pem hi an hmu ta a, “Hei, I hnungzanga hi buhfang tiat lekin a pem a nih hi,” an ti a. Sakawr thlaki sen chuan, “Chutianga ka pem chuan ka thi dawn a nih tak chu le, ka thih hunah chuan thangte dawh ula, chutah chuan min zalh ang che u. Sa chi tinrengin min rawn ei an tum ang a, ‘Phingnu leh Phingpa’ eitur a ni lo ti zel ang che u. Phingnu leh Phingpain min ei rawh se,” a ti a. A tuk khua a lo var chuan sakawr thlaki sen chu a thi ta a.

Rengtea te unau chuan thangte an dawh a, an sakawr duh ngawih ngawih ruang chu an hlang a. Sa chi tinreng chu ei tumin an lo kal a, “Rengte, sa hi kan ei dawn e,” tiin an rawn dil thin a. Rengtea chuan, “Phingnu leh Phingpa ta tur a ni e,” a lo ti zel a. Tuman an ei ngam ta lo va. Phingnu leh Phingpa chu an lo kal ve ta ngei a, “Rengte, hei kan ei dawn e, I phal ang chu maw,” an ti a. Rengtea chuan, “Sa tinrengin ei an tum a, kan phal lo zel a, in ei atan kan lo hum a ni e, in duh tawkin ei rawh u khai,” a ti a. Phingnu leh Phingpa chuan lawm takin an ei ta a, reiloteah an eizo ta vek a. An ei zawh hnu chuan Rengtea chu thei sak tak pum khat hi an pe a, “Min ngaih chang apiangin he thei hi han seh vak la, Phingnu leh Phingpa kan va ngai ve, han ti la, kan lo chhuak zel ang. Khawi hmunah pawh, lei khi karah pawh ni se la, kan lo chhuak zel ang,” an ti a. An kalsan ta a. Rengtea chu a lawm ta em em a, thlamuang takin a awm ta a.

Rengtea farnu chu a lo nula ta a, nula hmeltha tak mai a ni a. Vawi khat chu Rengtea vahbo hlanin Ramhuai tur nei kha a lo kal a. Tlangval hmeltha takah a chang a, Rengtea farnu chu a rawn rim vel ta a. A hmelthat em avangin a lo ngaizawng ta hle a. An inhmu zing deuh deuhva an induh ta hle mai a. Ramhuai tur nei chuan, “Rengtea dam chhung chuan kan innei thei dawn si lo va, engtin nge maw kan tihhlum ang le,” a ti a. Ramhuai tur nei chu muk takin a inngaihtuah a, “Rengtea lo haw hunah I pum lo tina der vak la, sakei hnute ka in loh chuan ka dam thei lo vang,” ti tlat ang che a ti a. Ramhuai tur nei chu a hawng ta a. Ramhuai tur nei hawn hnu chuan Rengtea chu a lo hawng ve ta a. A farnu chuan a pum a lo tina der ta chiam a, Rengtea chu a mangang ta hle mai a. A farnu chu a hmangaih em em si a.

A farnu pum na a dam theih tak si lovah chuan Rengtea chuan, “Engtin nge kan tih ang le?” a ti a. A farnu chuan, “Sakei hnutei in ila ka dam ang,” a ti a. Rengtea chuan sakei hnute sawr chu hrehin zuam lo hle mah se la, a farnu damna tur a nih dawn phawt chuan sakeipui no hruai lai hnute sawr tum chuan chhuah a tum ta a. “I damna tur a nih si chuan ka va zawng ang e,” a ti a. A chhuak ta a. Rengtea kal bo hlan chuan Ramhuai tur nei kha a lo kal a. Rengtea farnu nen chuan hlim takin an inkawm a, Rengtea chu sakei no hruai laiin lo sehhlum daih se an ti dun hle a.

Rengtea chu ramhnuaiah chuan a vak a vak a. A tihngaihna hre lo mangang chuan thei kha a hre chhuak a, an la a, an seh vak a, “Phingnu leh Phingpa ka va ngai em ve le,” a’n ti a. Chu veleh Phingnu leh Phingpa chu an lo chhuak ta vat a, “Rengte, eng nge I duh tak le?,” an ti a. Rengtea chuan, “Ka farnu pum a na a, sakei hnute in ila ka dam ang a ti a. Sakei hnute chu ka la ngam si lo va ni,” a ti a. Phingnu leh Phingpa chuan, “Lungngai duh suh kan han la ang e,” an ti a. Sakei no hruai lai pukah an kal a, awlsam takin sakei hnute chu an la ta mai a. Rengtea chu hlawhtling inti takin a hawng leh ta a. Rengtea lo hawng thawm an hriat veleh Rengtea farnu chuan a pum a tina der leh ta vak a. Ramhuai tur nei chu phengphehlepah a chang a, tukverhah a thlawk chhuak ta daih a. Rengtea chuan sakei hnute chu a intir a, a farnu pumna chu tlemin a dam deuh va, reiloteah a na leh ta chiam a.

Rengtea chu a mangang em em mai a. A farnu chuan, “Ramsa chi tinreng sa ei ila ka dam ang,” a ti zel a. Rengtea chuan ramsa chi hrang hrang sa chu Phingnu leh Phingpa zarah a hawnsak zel a, nimahsela, a dam thei chuang lo va. Ramhuai tur nei chuan, “Phingnu leh Phingpa fa thluak ei ila ka dam mai ang ti la,” a ti leh ta a. Rengtea farnu chuan Rengtea hnenah, “Ka damna tur I duh tak zet a nih chuan Phingnu leh Phingpa fa thluak ei ila ka dam ang,” a ti leh ta a. Rengtea chuan lak a hreh hle mai a, Phingnu leh Phingpa chu a chungah an tha hle si a. A farnu chu a hmangaih em avangin a damna tur a nih phawt chuan thil engpawh tihsak zel a duh a, hreh tak chungin Phingnu leh Phingpa fa thluak la tur chuan a kal leh ta a.

Lungngai tak chungin a thei kha an seh vak a, “Phingnu leh Phingpa ka va ngai em ve le,” a han ti a. Anni chu rang takin an rawn chhuak leh ta mai a. “Rengte, eng nge I duh le?” an ti a. Rengtea chuan a farnu pum nat dan zawng zawng chu a hrilh vek a, “Phingnu leh Phingpa fa thluak ei ila ka dam ang a ti tlat mai si a,” a ti a. Phingnu leh Phingpa chuan, “Rengte, kan fa thluak chu min laksak lo hram rawh khai. Kan hnute tui erawh chu kan lo pe ang che. I farnu hian a pum a tina der a ni. Ramhuai tur nei nen an inngaizawng a, tihhlum dan tur che an ngaihtuah thin a ni. I vahbo hlanin Ramhuai tur nei nen hian hlim takin an inkawm thin a. I lo haw thawm an hriat veleh Ramhuai tur nei chu phengphehlepah a chang a, a thlawk bo leh daih thin a ni. Tunah pawh hian an awm dun mek ang chu,” an ti ta a. Rengtea chu a thinur ta em em mai a. “In fa thluak chu ka la lo vang, in hnute tui pawh ka la hek lo vang,” a ti a. A hawng ta vang vang a.

In a thlen dawn chuan thawm a dim a, a ruktein an in chu bangawngah a bihthla ta a. Ramhuai tur nei leh a farnu chu hlim takin an lo inkawm a, an awm dun lai chu a va hmu ta mai a. A rilru a nain a thinrim em em a. Inchhungah a lut ta thut a, chuveleh Ramhuai tur nei chu phengphehlepah a chang a, tukverhah a thlawk chhuak nghal a. Rengtea chuan, “Ka nu leh pa eizotu leh kan sakawr thlaki sen thattu Ramhuai tur nei kha I lo thurual pui duh a maw?” tih leh a farnu sah chu a rual a, a sat hlum ta der a. Chutia a farnu a sat hlum lai chu Ramhuai tur nei khan a lo hmu reng a. A thinrim ta em em a.

Ramhuai tur nei chuan Rengtea chu tihhlum a tum ta a. Sakeiah a chang a, a um ta chiam a. Rengtea chuan a hlau hle mai a. Tihngaihna dang a hre si lo va. Sakei lah chuan a seh tak ngial dawn a. A thei kha a hre chhuak a, an seh vak a, “Phingnu leh Phingpa ka van ngai em ve le,” a han ti a. Phingnu leh Phingpa chu an rawn chhuak hlawl a, “Rengte, enge nge I duh tak le?” an ti a. Rengtea chuan, “Khu sakei khuan min um a, ka hlau em em a, tihngaihna ka hre lo a ni,” a ti a. Phingnu leh Phingpa chuan, “Hlau duh suh, keimahni’n kan han bitum ang e,” an ti a. Sakei chu an zuk bei a, awmsam takin an seh hlum ta der a. Rengtea chu a lawm em em a, thlamuang takin a awm ta a. Nupui hmeltha leh fel tak a nei a, hlim takin a awm ta a.