Sanghar leh Arpui leh Artui

Vawi khat chu Sanghar hian Arpui hi thianah siam a tum der a; mahse, a tum tak tak chu a remchan huna seh a, ei zawh vek a ni a. Vawi khat chu Sanghar chuan Arpui hnenah chuan, “Zaninah khawiah nge i riah dawn?” tiin a zawt a, Arpui chuan “Chhiarah ka riak ang,” tiin a chhang a. Zan a lo nih chuan a tuibawmah a riak ta hlauh a, Sanghar chuan ei tumin a rawn zawng ta a, Archhiar chu a han en a, Arpui chu a lo awm si lova, beidawngin a kir leh ta a. A tukah arpui nen chuan an inhmu leh a, Sanghar chuan, “Nizanah khawiah nge i riah?” a ti a, Arpui chuan, “Artuibawmah ka riak a ni,” a ti a . Sanghar chuan, “Zaninah khawiahnge i riah leh ang?” tiin a zawt leh a, Arpui chuan a tui awmna bawmah a riah leh tur thu a hrilh a. Mahse, zanah chuan chhiarah a riak ta zawk a, Sanghar chu a lo kal leh a, artuibawm chu a en a, Arpui chu a lo awm si lova, beidawngin a haw leh ta a, A tuk lehah chuan Arpui nen chuan an inkawm leh a, Sanghar chuan a riahna a lo zawt leh a, Arpui chuan chhiara a riah thu a hrilh a, Sanghar chuan a tum thumna atan Arpui chu, “Zaninah khawiahnge i riah ang?” tiin a zawt leh a, Arpui chuan chhiara a riah tur thu a hrilh a. Zan a lo nih chuan artuibawmah a riak leh ta zawk a, Sanghar chuan a zawng leh ta a, Archhiar chu a han en a, a hmu lova, Artuibawm a en leh a, Arpui chu a hmu ta a, a seh a, a tlanpui a daih mai a. Arpui chuan sawm lai a lo tui tawh a, Artuite chuan an nu thi ta chu phuba laksak ngei an tum a. An awmna chu chhuahsan an han tum a, a te ber tih loh a dang zawng chu an keh ta vek mai a, a te ber chuan amah chauhin a nu phuba chu lak a tum ta tho a , a kal chhuak ta a. Kalkawngah chuan thli a tawk a, khawia kal tur nge a nih a lo zawt nghal a, Artui chuan, “Kal tumna bik pawh ka nei hran lo ve,” tiin a chhang a, Thli chuan, “I nu phuba lak tumin i kal tih ka hria e, i hnenah ka kal ve ang a, ka tanpui thei mai thei che a sin,” a ti a. Tichuan thli chu artui hnenah chuan a kal ve ta a, reilote an kal hnu chuan Sazuthang an tawk a, ani chuan khawia kal tur nge an nih a lo zawt a. Mahse, anni chuan an chhang lo va. Sazuthang chuan, “Artui nu phuba la turin in kal dawn tih ka hria e, in hnenah ka lo kal ve ang a, ka tanpui thei mai thei che u a ni,” a ti a, tichuan, an pathum chuan an kal ta a.

An kalkawngah chuan a indawt zelin Suk le, Taivang te, Favai te leh Chem te an tawk a, an vai chuan kal an tum lui theuh a, an kal ho ta a. Nakin lawkah chuan Sanghar in chu an va thleng a, Sanghar chu a lo feh daih mai a. Thli chuan a va zawng ta a, a hlothlo lai chu a va hmu a, a pan hnai a, a nuai ta vak mai a, chutia thliin a han nuai takah chuan Sanghar chu vawt tiin a khur hlawk hlawk mai a.

Thli thangbo hlan chuan Sazuthang chu Sanghar in hnuaiah a lo inkam fel diam a, Suk chu kawngka lu chungah a lo inkham a, Artui chu thukah a inphum a. Taivang Ich Favai te chu chhuatah an awm a, Chem chu banglaiah a inthiat a. an vaiin an lo inring vek tawh a.

Sanghar vawt ti lutuk lo atanga lo haw chu a inah chuan a han lut a. Mei chhem a han tum a, thuka Artui inphum chu a puak thawr mai a, Sanghar chu a phu zawk a; a hlau lutuk chu tlanchhiat a tum a, chhuata Favai zingah chuan a tawhthlu a, Taivang chuan an seh ta noh noh mai a. Banglai lamah a tlan phei a, Chemin a lo sat a, pawnah a tlan chhuak a, Sukin a lo delh a, a in hnuaiah a tlan lut a, Sazuthangah a awk a, thih thengin thangah chuan a tang ta a ni. Artui chuan a nu thi phuba chu hlawhtling takin a la ta a ni.