SAZALTEPA LEH BAKVAWMTEPU

Hmanlai hian ramsa zawng zawng hi an inrawn khawm a, “Kawngpui i siam ang u,” an ti a. Sakhi te, Sazuk te, Sanghal te, sa zawng zawngte chu an kal ta a. Chumi zingah chuan Sazaltepa hi a tel ve a, mi vir tak a ni a. Kawng chu an han sial fai ta hun mai a, “Kan kawng rihfai hi tuman tihbawlhhlawh lovah, a tibawlhhlawh apiang chu eiah,” an ti a. An kawng rih fai hnu chuan Sazaltepa chu ava kal a, Tlumpui hi kawngah chuan a lo bawk a, a lo mawm hmiar mai a, ei atan a it ta em em mai a; a tih dan tur remchang a ngaihtuah ta a, kalkawng chu ava tibawlhhlawh a, Tlumpui chu a ei ta daih mai a. Chumi hnu chuan sa dang te chu an kawngah chuan an va kal leh a , ek an hmu ta a , “Sazaltepa, engah nge kalkawng i tihbawlhhlawh ni? Kawng tibawlhhlawh apiang chu ei zelah kan tih kha, kan ei ngei ang che maw le,” an ti a. Sazaltepa chuan, “Ka tibawlhhlawh awzawng hlei nem, Tlumpui a nih kha, keiman ka va hmu a, ka ei daih tawh nghe nghe a sin,” a lo ti a.

Nimahsela an awih duh lova, ei an tum ta a; Sazaltepa chu a theihtawpin a tlan a, an um ta vak mai a. Nakinah chuan Bakvawmtepu hi a va hmu a, sazaltepa chuan, “Ka pu, min hum rawh,” tiin a mangan thu chu a hrilh a. Bakvawmtepu chuan, “Ka nau awmah i awm duh ang emaw chu?” a lo ti a. “Duh e,” tiin Bakvawmte pu inah chuan a awm ta a, a nau chu a awmsak ta a. Bakvawmtepu chu nitin a feh thin a. Ni khat chu Sazaltepa chuan ar hi ei atan a it ta hle a, a pu feh hlan chuan a lo ei ta mai a. Tlaiah chuan Bakvawmtepu feh chu a lo hawng a, a lo thlen veleh chuan a hnenah, “Ka pu, vawiina ka nau a tlei thei lova, ar a ngen avangin ka talh ta mai,” a ti a. Bakvawmtepu chuan, “A pawi hlei nem, i nauvin a ngen chuan,” a ti mai a. A tukah a zuk feh leh a, a feh hlan chuan Sazaltepa chuan vawk a lo ei leh a. “Ka nauvin a ngen,” ti bawk chuan a lo hrilh leh a, Bakvawmtepu chuan, “A pawi love, i nauvin a ngen zawngin,” a ti zel a. Bakvawmtepu chu a zuk feh leh a, chumi ni chuan Sazaltepa chuan a nau chu a lo ei ta daih mai a, a tlanbo ta daih a.

Tlaiah chuan Bakvawmtepu chu a lo hawng a, Sazaltepa chu a lo awm ta hauh lo mai a. Bakvawmtepu chuan a nau a lo ei a ni tih a hriat chuan a thinur nasa mai a, phuba lak mawlh a tum ta a. Tin, Sazaltepa pawh khan a chungah Bakvawmtepu a thinur nasa dawn tih a hria a, a theihtawpin a inveng ve bawk a. Lo hi a nei ve a, chutah chuan a feh thin a, chu chu Bakvawmtepu chuan a lo hria a, a thlamah chuan a lo chang ta a, Sazaltepa chu a lovah chuan a zuk feh a, ral atangin, “Ka thlam khu ka kohva a ei chuan mi an awm lo a ni ang,” a ti a. “Ka thlam” a han ti vak a. Bakvawmtepu khan a thusawi kha a lo hre pha si a, “Ei “ a ti ta vak a. Sazaltepa chuan mi an awm tih a hria a, a hawng ta daih a. A tukah chuan a zuk feh leh a, thlam chhak fe atang chuan, “Ka thlam khu ka kohva a ei loh chuan mi an awm a ni ang,” a ti leh ta thung a. “Ka thlam” a han ti leh vak a. Bakvawmtepu chu a ei duh ta lova. Sazaltepa chuan mi an awm tih a hria a, a hawng leh ta daih mai a.

Bakvawmtepu chuan engtinmah a ti thei lo tih a hriatin a thlam bulah chuan sazu ah a chang a, kua a hreuh ta a. Sazaltepa chu a zuk feh leh a, thlam bul a thlen chuan mi vir tak ngang kha a nih avangin sazu kua a hmuh chuan a lawm hle mai a. A lai ta sauh sauh va. A han zen a, Bakvawmtepu khan a lo seh vak mai a. A seh hlum ta der mai a ni an ti.